Tramp Bayden administrasiyasının bu prinsipini bəri başdan rədd edəcək
"Ağ Evin yeni sahibi Donald Trampa yaxınlığı ilə tanınan və Rusiya-Ukrayna müharibəsi başlayandan sonra Kreml sahibi Vladimir Putindən müsahibə ala bilən yeganə amerikalı jurnalist Taker Karson qaş düzəltmək istəyərkən, göz çıxarıb".
Bu barədə politoloq Elxan Şahinoğlu deyib.
Ekspert bildirib ki, o, həmkarı Mett Taibbiyə müsahibəsində deyib ki, guya Co Bayden ABŞ prezidenti olduğu müddətdə administrasiya Rusiya Prezidenti Vladimir Putini sıradan çıxarmağa cəhd edib:
"Belə bir planın olub-olmadığını iddia etmək çətindir. Bəlkə də, Vaşinqtonda hesab ediblər ki, Putin olmasa, Rusiya müharibəni dayandıracaq. Bunda müəyyən qədər məntiq var. Məsələn, Putinin yerinə Baş nazir Mixail Mişustin keçsə, böyük ehtimalla o, müharibənin davamında maraqlı olmayacaq. O, baş nazir təyin olunandan bu yana bir dəfə də müharibə barədə fikir bildirməyib. Mişustin müharibənin Rusiya iqtisadiyyatına dağıdıcı zərbə vurduğunu anlamamış deyil. O ki qaldı Vaşinqtonun Putini aradan götürmək planına, ABŞ tarixində belə hallar az olmayıb. Mərkəzi Kəşfiyyat İdarəsinin Kubanın keçmiş lideri Fidel Kastronu öldürmək üçün müxtəlif planları olub, sadəcə, reallaşdıra bilməyib. Mərkəzi Kəşfiyyat İdarəsi 1973-cü ildə çevriliş yolu ilə Çilinin solçu Prezidenti Salvador Alyendeni general Auqusto Pinoçetlə əvəz edə bilib. Doğrudur, bu zaman Alyende həlak olub və Pinoçetin hərbi xuntası minlərlə çililinin ölümünə səbəb olub. Ancaq bu, Vaşinqtonu az narahat edib".
Analitikə görə, Karslon düşünüb ki, Donald Tramp Bayden administrasiyasının “Putin yoxdursa, problem də yoxdur” prinsipini bəri başdan rədd edəcək:
"Həqiqətən Tramp Ağ Evdə ilk günlərindən başlayaraq Baydenin bir çox qərarını ləğv edib. Ancaq bəzi məsələlərdə davamlılıq istisna deyil. Keçmiş Prezident Duayt Eyzenhauer 1961-ci ildə kreslosunu seçkidə qələbə qazanan Con Kennediyə təhvil verəndə Mərkəzi Kəşfiyyat İdarəsi Kubaya qarşı müdaxilə planı hazırlamışdı. Kennedi planı bəyənməsə də, mexanizm işə düşmüşdü və Ağ Evin yeni sahibi Mərkəzi Kəşfiyyat İdarəsinə “yox” deyə bilmədi. Müdaxilə Amerika üçün məğlubiyyətlə nəticələnsə də, Kennedi sələfinin hazır planından imtina edə bilməmişdi. Eyni ilə Tramp üçün maraqlı olsa, o da Mərkəzi Kəşfiyyat İdarəsinin və Pentaqonun əvvəlcədən hazırlanan planlarına “hə” demək məcburiyyətində qala bilər".
