ABŞ Prezidenti Donald Trampın administrasiyası Ukraynada davam edən münaqişənin həlli üçün yeni bir təşəbbüslə çıxış edib. Məlumata görə, Vaşinqton Ukraynada aprelin 20-dək, yəni Pasxa bayramına qədər atəşkəs əldə etməyə çalışır. Bu barədə “Blumberq” agentliyi öz mənbələrinə istinadən məlumat yayıb. Mənbələrin bildirdiyinə görə, Tramp administrasiyası Rusiya və Ukrayna arasında vasitəçi rolunu gücləndirərək tərəfləri müvəqqəti sülh razılaşmasına razı salmağa çalışır. Ağ Evin yüksək səviyyəli rəsmiləri Moskva və Kiyev arasında diplomatik təmasları artıraraq danışıqlar üçün əlverişli şərait yaratmağa cəhd göstərir.
Xanım politoloq Aytən Qurbanova “Sherg.az”a söyləyib ki, atəşkəsin əldə olunması müharibənin bitməsi demək deyil:
“Düşünürəm ki, Donald Tramp özü də Rusiya-Ukrayna müharibəsi ilə bağlı seçkiqabağı təşviqat dövründə verdiyi vədlərin yerinə yetirilməsinin çox asan olmayacağını bilir. Hətta proses ABŞ-Avropa İttifaqı qarşıdurması kontekstində davam etdiyi müddətcə atəşkəs ilə bağlı ehtimallar da sual altına düşmüş olur, çünki ziddiyyətli maraqlar çoxdur. Belə olan halda masada taleyi həll olunan Ukrayna üçün şərtlər daha ağır ola bilər. Təəssüflə qeyd etmək lazımdır ki, Ukraynanın ərazi bütövlüyü məsələsi danışıqlar prosesində nəinki prioritet deyil, ümumiyyətlə yaxın perspektivdə heç bir halda real görünmür. Bu nöqteyi-nəzərdən yanaşdıqda, atəşkəsin əldə olunması ilə bağlı danışıqlar Ukraynada atəş səslərini qısamüddətli dayandıra bilər, amma prosesləri Ukraynanın xeyrinə istiqamətləndirə bilməz”.
