Hazırda “Qazprom” Serbiya ilə yeni qaz müqaviləsinin şərtləri üzərində işləyir və müvafiq göstərişlər verilib.
Teleqraf xəbər verir ki, bu barədə jurnalistlərə Rusiya baş nazirinin müavini Aleksandr Novak bildirib.
"Bu, prezidentlər səviyyəsində Vuçiçlə görüşdə də müzakirə edilib və müvafiq tapşırıqlar verilib. Hazırda "Qazprom" bununla bağlı işləyir", - o bildirib.
Serbiya prezidenti Aleksandr Vuçiç mayın 9-da Moskvaya səfəri zamanı Rusiya lideri Vladimir Putinlə yeni qaz sazişinin bağlanması imkanlarını müzakirə edib. Serbiya dövlətinin başçısı daha sonra respublikanın Rusiyanın enerji resursları ilə təchizatının Belqrad üçün müstəsna əhəmiyyət kəsb etdiyini bildirib və tədarükün “yaxşı şərtlərlə” davam etdiriləcəyinə ümid etdiyini bildirib.
