Yanvarın 10-da Qırğızıstanda növbədənkənar prezident seçkiləri və respublikada idarəçilik formasının müəyyənləşdirilməsi ilə bağlı referendum keçirilir.
AZƏRTAC xəbər verir ki, Qırğızıstan Mərkəzi Seçki Komissiyasının sədri Nurjan Şaydabekova Bişkekdə keçirdiyi mətbuat konfransında referendumun baş tutmuş hesab olunduğunu bildirib. O deyib ki, saat 18.00-a olan məlumata görə, prezident seçkilərində seçicilərin 33,13, referendumda isə 33,08 faizi səs verib. Bu isə prezident seçkilərində 1 milyon 180 min 515, referenduma isə 1 milyon 778 min 656 səs deməkdir. Beləliklə, Qırğızıstan qanunları ilə referendumda seçicilərin 30 faizindən çoxu səs verdikdə referendum baş tutmuş hesab olunur.
Xatırladaq ki, prezident seçkilərinə 17 namizəd qatılıb. Onların arasında siyasətçilərlə yanaşı, məmurlar, iş adamları, güc strukturlarının nümayəndələri də var.
Prezident seçkiləri və referendumda TÜRKPA-nın müşahidə missiyasının tərkibində Azərbaycan Milli Məclisinin deputatı Fazil Mustafa, Müstəqil Dövlətlər Birliyinin Parlamentlərarası Assambleyasının və İcraiyyə Komitəsinin xətti ilə deputat Sabir Hacıyev, Azərbaycan Mərkəzi Seçki Komissiyasının xətti ilə Etibar Quliyev və Rəşid Yusifbəyli, Türkdilli Dövlətlərin Əməkdaşlıq Şurasının tərkibində Baxşeyiş Əskərov və Ceyhun Şahverdiyev müşahidəçi kimi səsvermə prosesini izləyiblər.
