Mayın 18-də Rusiya Estoniyanın Sillamae limanından çıxan Yunanıstanın "Green Admire" neft tankerini saxlayıb. Bu, ilk belə haldır.
Axar.az xəbər verir ki, bu barədə Estoniya Xarici İşlər Nazirliyi məlumat yayıb.
Bildirilib ki, Liberiya bayrağı altında üzən “Green Admire” tankerinin saxlanılması Rusiyanın ərazi sularında baş verib. Gəmi əvvəlcədən razılaşdırılmış marşrut üzrə hərəkət edirdi.
“Naviqasiya təhlükəsizliyi baxımından seçilən və ciddi şəkildə dövlət sərhədləri boyunca keçməyən bu marşrut Rusiya, Estoniya və Finlandiyanın qarşılıqlı razılığı əsasında yaradılıb”, - deyə vurğulanıb.
XİN-in məlumatına görə, belə hadisələrin qarşısını almaq üçün Sillamae limanına gedən gəmilər Estoniyanın ərazi suları vasitəsilə istiqamətləndiriləcək.
"Bugünkü hadisə göstərir ki, Rusiya gözlənilməz davranmaqda davam edir. Mən də bu insidentlə bağlı müttəfiqlərimizi məlumatlandırmışam", - Estoniyanın xarici işlər naziri Marqus Tsaxna qeyd edib.
