NATO-nun baş katibi Mark Rutte “Qlobal Avropa” konfransında bildirib ki, hazırda Qrenlandiyanın ətrafında heç bir Rusiya və ya Çin gəmisinin olmadığı məlumdur, lakin onların istənilən vaxt orada peyda ola biləcəyini vurğulayıb.
Sherg.az xəbər verir ki, Rutte bu bəyanatı, Danimarkadan olan Avropa Parlament üzvünün “Qrenlandiyanın sakinləri qorxu içindədir, halbuki ətrafında heç bir xarici gəmi yoxdur” sözlərinə cavab olaraq verib. Əvvəlcə Donald Tramp iddia etmişdi ki, Qrenlandiyanın ətrafında “hər yerdə Rusiya və Çin gəmiləri var” və Danimarka adanın təhlükəsizliyini təmin edə bilməz.
NATO baş katibi alyans daxilində Qrenlandiyanın müdafiəsinin gücləndirilməsi ilə bağlı danışıqları davam etdirəcəyini və bununla ABŞ-ın adanı ilhaq etməsinə ehtiyac qalmayacağını qeyd edib. Tramp 2025-ci ildə bu barədə fikirlərini bildirmişdi.
Qrenlandiya Danimarkanın avtonom ərazisi hesab olunur və 1951-ci ildə ABŞ ilə Danimarka arasında imzalanan Qrenlandiyanın müdafiəsi müqaviləsinə əsasən, ABŞ adanı mümkün hücumlardan qorumağı üzərinə götürüb.
