Almaniyanın müdafiə xərclərini artırması ehtiyat tədbiridir
Almaniya hökuməti bu il müdafiə xərclərini rekord - 53,03 milyard avroya çatdırmaq niyyətindədir ki, bu da keçən ildəkindən 3,2 faiz çoxdur. Bu barədə “DPA” agentliyi Almaniyanın NATO-ya təqdim etdiyi sənədə istinadən xəbər verib. “NATO ümid edir ki, Almaniya kimi ölkələr tərəfindən xərclərin artırılması, ittifaqın yükünün ədalətli bölüşdürülməsini tələb edən ABŞ-la fikir ayrılıqlarının həllinə kömək edəcək”- deyə, nəşr bildirib. Qeyd edək ki, 2020-ci ildə Almaniyanın müdafiə xərcləri 51,39 milyard avro olub. Bu, ÜDM-nin 1,57 faizini təşkil edib.
Mövzu ilə bağlı fikirlərini "Şərq"lə bölüşən hərbi ekspert Tərlan Eyvazov bildirib ki, Almaniya kimi qabaqcıl Avropa ölkəsinin müdafiə xərclərini gücləndirməsi təbii ki, şərqdən gözlənilən təhlükə ilə bağlıdır. Ekspert qeyd edib ki, Rusiya bütün dövrlərdə olduğu kimi son dövrdə də daha kəskin və fəal şəkildə qərbi təhdid etməyə başlayıb:
"Rusiya daima özünün hərbi gücünü nümayiş etdirməyə çalışır. O açıqdan-açığa öz qonşu və Avropa dövlətləriylə güc dili ilə danışır. Digər tərəfdən Almaniyanın özü həm də Avropa hərbi blokunun ayrıca NATO-dan kənar yaradılmasının təşəbbüskarıdır. Düzdür, bu, hələ ki uğurla nəticələnməyib. Amma hər halda bu ideyadan da vaz keçilməyib.
Avropada əsasən Almaniyanın təşəbbüsü ilə dollardan qurtulmaq üçün avro buraxıldı. Yəni bütün birləşmiş Avropa ölkələrində avro dövriyyəyə girdi və hamısı istifadə etməyə başladı. Ola bilsin ki, dünyanın hegemon dövlətlərinin asılılığından qurtulmaq üçün bu addımı atırlar. Həm də Avropa ölkələri özlərinin güclənməsini istəyirlər və bu məqsədlə də hərbi sahəyə güclü maliyyə ayırırlar".
Hərbi ekspert qeyd edib ki, digər tərəfdən bu həm də silah istehsal edən şirkətlərin maliyyəsi ilə bağlı ola bilər:
"Bu olduqca böyük maliyyə vəsaitidir. Bu, narkotika ticarətindən sonra ən böyük ticarət, qazanc mənbəyidir. Bir çox böyük transmilli və digər şirkətlər bu işdə işləyirlər. Burda yüz minlərlə insanın iş yeri var. Silahların satılması, hansısa ölkələrə ixrac olunması üçün büdcələrə əlavələrin edilməsi və hərbi xərclərin artırılması labüddür".
