Pekinə səfər edən Belarus lideri Aleksandr Lukaşenko ötən gün Çin sədri Si Szinpinlə görüşüb.
Axar.az xəbər verir ki, Lukaşenkonu yenidən Belarus prezidenti seçilməsi münasibətilə bir daha təbrik edən Si iki ölkəni bir-birinə səmimi və etimadla yanaşan əsl dost və yaxşı tərəfdaş adlandırıb.
O, hər iki tərəfi Birləşmiş Millətlər Təşkilatı və Şanxay Əməkdaşlıq Təşkilatı kimi çoxtərəfli strukturlar çərçivəsində koordinasiya və əməkdaşlığı daha da gücləndirməyə, hegemonluğa və zorakılığa qarşı birgə çıxmağa, beynəlxalq ədaləti müdafiə etməyə çağırıb.
Lukaşenko Çinə uzunmüddətli güclü dəstəyinə və ölkəsinə göstərdiyi yardıma görə təşəkkür edib, Belarusun Çinə yüksək dərəcədə etimad göstərdiyini və Çinlə əməkdaşlığı fəal şəkildə inkişaf etdirəcəyini söyləyib. Lukaşenko Çinin dünya üçün nümunə olduğunu vurğulayıb.
Qeyd edilib ki, bu, Lukaşenkonun hakimiyyəti ərzində Çinə 15-ci səfəridir.
