Rusiya Prezidenti Vladimir Putin 30 gün əvəzinə 30 saatlıq atəşkəsdən danışır.
APA xəbər verir ki, bunu Ukraynanın xarici işlər naziri Andriy Sibiqa “X” hesabında bildirib.
“Ukraynanın mövqeyi aydın və ardıcıldır: biz hələ martın 11-də Ciddədə ABŞ-ın irəli sürdüyü 30 günlük tam və şərtsiz atəşkəs təklifini qəbul etdik. Rusiya isə bu təklifi rədd etdi və artıq 39 gündür ki, Birləşmiş Ştatların bu təşəbbüsünə “yox” cavabını dəyişmir”.
Sibiqanın sözlərinə görə, Moskva müxtəlif şərtlər irəli sürərək Ukrayna ərazisində, mülki əhali və mülki infrastruktur obyektlərinə qarşı terroru daha da gücləndirib
“Putin indi guya atəşkəsə hazır olduğunu bəyan edir. Lakin 30 gün əvəzinə 30 saatlıq atəşkəsdən danışır. Təəssüf ki, biz artıq uzun müddətdir şahidik ki, onun sözləri əməllərinə uyğun gəlmir. Biz bilirik ki, onun sözlərinə etibar etmək olmaz və ona görə də sözlərə deyil, əməli addımlara baxacağıq” - nazir vurğulayıb.
Sibiqa onu da bildirib ki, Rusiya istənilən vaxt mart ayından bəri gündəmdə olan bu təklifi — tam və şərtsiz 30 günlük atəşkəsi — qəbul edə bilər.
“Biz rus qoşunlarının bütün cəbhələrdə faktiki olaraq atəşi dayandırmasını görmək istəyirik. Eyni zamanda, bütün tərəfdaşlarımızı və beynəlxalq ictimaiyyəti ayıq-sayıq olmağa çağırırıq. Çünki yalnız əməllər – sözlər yox – həqiqəti göstərir: bu müharibə Rusiyaya görə ilə başlayıb və onun üzündən də davam edir” - nazir qeyd edib.
