Macarıstan Ukraynanın təhdidlərini rədd edir, bu ölkənin Silahlı Qüvvələrinin "Drujba" neft kəmərinə zərbələrini isə öz suverenliyinə hücum kimi qiymətləndirir.
Teleqraf xəbər verir ki, bunu Macarıstanın xarici işlər naziri Peter Siyarto Ukrayna Prezidenti Volodimir Zelenskinin son açıqlamalarını şərh edərkən bildirib.
"Macarıstan Ukrayna Prezidentinin təhdidlərini qətiyyətlə rədd edir. Biz suverenliyi və ərazi bütövlüyünü beynəlxalq siyasətin əsas dəyərləri hesab edirik, buna görə də bütün ölkələrin suverenliyinə və ərazi bütövlüyünə hörmət edirik və onlardan da eyni şeyi gözləyirik", - XİN rəhbəri feysbuk sosial şəbəkəsindəki səhifəsində yazıb.
O, Ukraynanın "Drujba" neft kəmərinə hücumunu Macarıstanın enerji təchizatının təhlükəsizliyinə müdaxilə adlandırıb.
"Son günlərdə Ukrayna enerji təchizatımızın təhlükəsizliyinə ciddi müdaxilə edib. Enerji təhlükəsizliyinə müdaxilə suverenliyə müdaxilə kimi qiymətləndirilməlidir. Bizim heç bir əlaqəmiz olmayan müharibə suverenliyimizin pozulması üçün qanuni əsas deyil. Biz Volodimir Zelenskini Macarıstana qarşı təhdidləri dayandırmağa və enerji təhlükəsizliyimizi təhdid etməməyə çağırırıq", - nazir əlavə edib.
