Suriyada İsrail və ABŞ çalışacaq ki, mərkəzi hökumət zəif olsun və dağınıq bir ölkə kimi fəaliyyət göstərsin
Türkiyə Suriyanın şimalında PKK ilə əlaqəli qüvvələrin mövcudluğuna son qoymağın zəruriliyi ilə bağlı ABŞ-yə xəbərdarlıq edəcək. Əks halda, Ankaranın özü bölgəni terrorçulardan təmizləmək üçün tədbirlər görəcək. Məlumata görə, Türkiyənin bu mesajı Ankarada xarici işlər naziri Hakan Fidan və ABŞ dövlət katibi Antoni Blinken arasında dekabrın 13-nə planlaşdırılan danışıqlarda səslənəcək. Qeyd edək ki, Türkiyənin Milli İstihbarat Təşkilatı (MİT) Suriyada PKK/YPG terror təşkilatının Əsəd rejimindən ələ keçirdiyi silah və sursatları daşıyan konvoyuna qarşı uğurlu əməliyyat həyata keçirib. Əməliyyat nəticəsində 12 yük maşını, 2 tank və 2 sursat anbarı məhv edilib. MİT Əsəd rejiminin süqutundan sonra bölgədəki hadisələri yaxından izləyərək PKK/YPG-nin rejimlə əldə etdiyi razılaşmalar nəticəsində müxtəlif silah və ağır texnikaları ələ keçirdiyini müəyyən edib. Terrorçuların gecə vaxtı bu silah və sursatları yük maşınlarına yükləyərək bölgədən uzaqlaşdırmağa çalışdıqları aşkar edilib. Bu məlumatlar əsasında həyata keçirilən əməliyyatda, konvoyda olan 12 yük maşını, 2 tank və 2 sursat anbarı məhv edilib. Məlumata görə, terror təşkilatı ələ keçirdiyi bu hərbi avadanlıqları Türkiyəyə qarşı istifadə etməyi planlaşdırırdı. MİT mənbələri bildirir ki, Suriyada yaranmış mövcud şəraitdə terror təşkilatının sərhəd bölgələrində möhkəmlənərək Türkiyəyə qarşı fəaliyyət göstərməsinə icazə verilməyəcək və bu cür əməliyyatlar davam etdiriləcək. Bu əməliyyat MİT-in bölgədəki effektli kəşfiyyat və əməliyyat qabiliyyətini bir daha nümayiş etdirərək Türkiyənin milli təhlükəsizliyinə yönəlmiş təhdidlərə qarşı qətiyyətli mövqeyini ortaya qoyur.
Siyasi şərhçi Məhəmməd Əsədullazadə "Sherg.az"a deyib ki, Türkiyənin Suriyanın şimalında PKK-YPG terror təşkilatına qarşı hərbi əməliyyatları İsrailin kəskin reaksiyasına səbəb olub. Çünki İsrail və ABŞ Suriyanın şimalında yeni "kürd muxtariyyəti"nin qurulması planına malikdir:
"İsrail HƏMAS-a görə Türkiyəyə qarşı PKK və YPG-ni dəstəkləyir. Həmçinin bu müstəvidə ABŞ ilə koordinasiyalı şəkildə fəaliyyət göstərir. İsrailin Suriyanın strateji hərbi hədəfləri vurması əsasən yeni hökumətin PKK-ya qarşı hərbi əməliyyatlar riskinin qarşısını almaqdır. Suriyada İsrail və ABŞ çalışacaq ki, mərkəzi hökumət zəif olsun və dağınıq bir ölkə kimi fəaliyyət göstərsin. Türkiyə rəhbərliyi Suriyada qərarlı şəkildə fəaliyyət göstərərsə, hər iki ölkənin planlarını neytrallaşdıra biləcək. Türkiyəyə qarşı PKK-nın yeni terror aktı törətməsi mümkündür. İsrail rəhbərliyi Suriyada sabit hakimiyyətin formalaşmasından sonra Fələstin dövlətinin qurula biləcəyindən narahatdır. Prezident İlham Əliyevin Türkiyə Prezidenti Rəcəb Tayyib Ərdoğanla telefonla danışığı və Suriya məsələsində ortaq mövqedən çıxış etməsi, bir daha Azərbaycanın qardaş ölkənin yanında olduğunu göstərdi".
