ABŞ Prezidenti Donald Tramp bildirib ki, onun iştirakı olmadan Rusiya və Ukrayna razılaşma əldə edə bilməyəcək.
APA xəbər verir ki, bu barədə Tramp Əbu-Dabidə “Fox News”a müsahibəsində deyib.
Trampın sözlərinə görə, Ukrayna müharibəsinə son qoymaq üçün o, Vladimir Putinlə bir araya gəlməlidir.
"Mənim Putinlə çox yaxşı münasibətim var. Düşünürəm ki, biz razılaşacağıq. Biz bir araya gəlməliyik və düşünürəm ki, yəqin ki, bunu planlaşdıracağıq", - o əlavə edib.
Qeyd edək ki, ötən gün İstanbulda Rusiya və Ukrayna arasında danışıqlar keçirilib.
Türkiyənin xarici işlər naziri Hakan Fidan bildirib ki, Türkiyənin vasitəçiliyi ilə keçirilən gərgin diplomatik danışıqlar etimad gücləndirici tədbir kimi hər tərəfdən 1000 məhbusun mübadiləsi barədə razılıq əldə olunub. O bildirib ki, Ukrayna və Rusiya rəsmiləri atəşkəslə bağlı danışıqlar üçün yenidən görüşmək barədə prinsipial razılığa gəliblər.
