Aylardır İran 2-3 gündən bir irimiqyaslı və intensiv hərbi təlimlər keçirir. Bunun iki məqsədi var: birincisi, İrana hücum etməyin lazım olmadığını xarici dünyaya göstərmək, ikincisi, öz cəmiyyətini arxayınlaşdırmaq.
Bu sözləri yerli mediaya geniş müsahibəsində erməni ekspert Sergey Melkonyan deyib.
O bildirib ki, İranın ciddi şəkildə müharibəyə hazırlaşması göz qabağındadır:
“İrana qarşı zərbənin olub-olmaması yalnız Netanyahunun (İsrail baş naziri – red.) özünü necə təqdim edəcəyindən asılıdır. Beləliklə, bizim həm eskalasiya, həm də deeskalasiya göstəricilərimiz var”.
Politoloq Oqtay Qasımov "Sherg.az"a deyib ki, İran və İsrail arasında keçən il baş verən qarşıdurmanın səbəbləri bəlli idi:
"İranda molla rejimi qurulandan Yaxın və Orta Şərqdə özünün proksi qüvvələrini yaratmaqla İsraili mühasirəyə alaraq diz çökdürmək istəyirdilər. Bu qruplaşmalara Suriyada Bəşər, Livanda Hizbullah, Qəzzada HƏMAS və Yəməndə Husiləri qeyd edə bilərik. Məhz 2023-cü ildə İranın təhriki ilə HƏMAS-ın İsrailə hücumları oldu. Nəticədə bölgədə qanlı savaş başladı ki, bitməsi bundan sonra da zaman alacaq. Atəşkəs imzalansa da, müəyyən insidentləri hələ də görməkdəyik. İsrail 2023-cü ilin sonu və 2024-cü il ərzində İranla faktiki olaraq, 5 cəbhədə müharibə apardı. Nəzərə alsaq ki, ötən il rəsmi Tehran 2 dəfə İsrail ərazisinə dron və raketlərlə hücum təşkil etsə də, məqsədinə çata bilmədi. Əksinə, rəsmi Qüdsün 2024-cü ilin oktyabrında həyata keçirdiyi cavab hücumları daha çox effektiv nəticə verdi. Belə ki, İranın hava hücumundan müdafiə sistemlərinin əhəmiyyətli hissəsi sıradan çıxarıldı. Bununla yanaşı, Tehran uzun müddətdən bəri tez-tez hərbi təlimlər keçirmək və bu sahədə ritorikanı yüksəltməklə həm dünyaya mesaj verməyə çalışır ki, İrana hücum etmək qarşı tərəfə baha başa gələ bilər, həm də daxili auditoriyanı nisbətən sakitləşdirmək istəyir. Eyni zamanda bütün bunların icrası kifayət qədər ciddi vəsait tələb edir və molla rejimi korrupsiyalaşır".
Politoloq vurğulayıb ki, Yaxın zamanda İran-İsrail müharibəsinin başlayacağını proqnozlaşdırmaq çətindir:
"Bu, daha çox ABŞ Prezidentinin pozisiyasından asılıdır. Donald Tramp İrana qarşı sərt mövqedə olsa da, perspektivdə bu dövlətlə savaşa başlamaq istəyib-istəməməsi də sual altındadır. Baxmayaraq ki, onun müşaviri bir müddət öncə İrana qarşı hərəkət etməyin vaxtının çatdığı ilə bağlı paylaşım etmişdi. İsrail bu məsələləri ABŞ ilə koordinasiya edir. Əgər Trampdan razılıq olarsa, İsrail İranın hazırkı ən zəif dövründə zərbələr endirə bilər. Çünki keçən il rəsmi Tehran üçün çox uğursuz oldu. Çünki 2024-cü ilin sonunda Yaxın və Orta Şərqdəki mövqelərini ciddi şəkildə itirdi".
