Türkiyənin müdafiə naziri Yaşar Gülər Ukrayna Müdafiə Təmas Qrupunun iclasında çıxışı zamanı Prezident Rəcəb Tayyib Ərdoğan və ABŞ Prezidenti Donald Trampın Ukraynada davamlı atəşkəsin əldə olunması üçün qətiyyətli mövqe sərgilədiyini qeyd edib.
Nazir, Rusiya-Ukrayna müharibəsinin dayandırılması istiqamətində Türkiyənin səylərinin davam etdiyini vurğulayıb.
“Cənab Prezidentimiz və ABŞ Prezidenti Tramp Ukraynada daimi atəşkəsin bərqərar olunması üçün güclü iradə ortaya qoyub. Bu istiqamətdə fəal təmaslarımız davam edir. Türkiyə olaraq, cənab Trampın iştirakı ilə atəşkəs və sülhün təmin olunması üçün ev sahibliyi etməyə hazırıq”, – deyə Gülər bildirib.
Politoloq Tural İrfan Sherg.az-a bildirib ki, Rusiya Ukrayna müharibəsinin durmasını və atəşkəsin olmasını istəyən Türkiyə bu məsələdə çox səylər göstərir:
"Əslində əvvəllər Ukrayna prezidentinə qarşı radikal tutumu ilə özünü nümayiş etdirən ABŞ prezidentinin də "yumşalması" Türkiyənin vasitəçilik səylərindən sonra baş verdi. Lakin bu danışıqların effekt verdiyi ən azı atəşkəsin meydana çıxdığı məqamda Türkiyənin həlledici statusunu, dünyadakı proseslərə təsir qüvvəsini hesablayan bəzi Qərb dairələri bunun baş tutmamasında maraqlıdır. Bu, müharibədir və tərəflər bir - birinə qarşı hərbi əməliyyatlar hazırlayıb həyata keçirirlər, milyonlarla, milyardlarla bir-birinə ziyan vururlar. Fəqət məhz Türkiyənin vasitəsilə danışıqların aparılması ərəfəsində Ukraynanın Rusiya hərbi aerodromlarına məhvedici zərbələr endirməsi onun danışıqlarda əlini gücləndirməkdən daha çox dialoqun pozulmasına aparan yol kimi də qiymətləndirilə bilər. Çünki bu, Rusiyanı da Ukraynaya hücuma təhrik edir. Hesab edirəm ki, Avropa ölkələrinin bəziləri bu savaşın bitməsində maraqlı deyillər. Şübhəsiz ki, bu müharibəni onlar başlayıb. Məqsədə tam çatmamış bitirmək istəmirlər. Hazırda Türkiyənin Rusiya və Ukrayna arasındakı vasitəçiliyinə zərbə vurmaq və müharibəni davam etmək üçün proses gedir. Hətta bir qədər əvvəl Almaniya və Böyük Britaniyanın da hazırlaşdığı qeyd olunurdu. Mütəxəssislər bildirir ki, Ukraynanın Rusiya daxilində məlum sarsıdıcı əməliyyatı keçirməsində Qərb dövlətlərinin kəşfiyyatının böyük rolu olub".
Politoloq əlavə edib ki, neçə illik müharibədə bu əməliyyatlara məhz Türkiyənin vasitəsilə danışıqlar başladığı ərəfədə start verməyin özü əslində məsələnin mahiyyətini açır:
"Lakin buna baxmayaraq, Türkiyə öz təsir vasitələrindən istifadə edərək, ABŞ-nin də dəstəyi ilə bu proseslərin nəzarətdən çıxmasına imkan verməyəcək və danışıqlarda mütləq bir nailiyyət əldə olunacaq.
Türkiyənin bu xoşməramlı müdaxiləsi nəticəsində həm Rusiya həm də Ukrayna sülhə gəlməyə məcbur olacaq. Çünki problemlər daha da artır və hər iki ölkənin resursları tükənmək üzrədir. Belə olduğu halda da həm Rusiyaya həm də Ukraynaya başqa dövlətlər hərbi dəstək verməyə cəlb olunur. Bunun da miqyası artdıqca dünya müharibəsinə bir yol açılır. Türkiyə müdafiə nazirinin fikirləri onu göstərir ki, Türkiyə bu problemin həll edilməsi üçün tam səfərbər olub. Vəziyyəti yenidən alovlandıranların təxribat planları və danışıqları puç etmək niyyətində olanlar qarşısında Türkiyə və ABŞ-nin birlikdə səyləri siyasi vəziyyəti nəzarətə götürməyə kömək edəcək. Həm Rusiya həm də Ukrayna Türkiyəyə etibar və etimad edir".
Tural İrfanın sözlərinə görə, Türkiyədən başqa öz maraqlarını nəzərə almadan bu problemin həllini istəyən yoxdur:
"Digərləri hər biri öz maraqları çərçivəsində təklif verir yaxud daha da münaqişənin qızışmasına dəstək olur. Lakin Türkiyənin obyektiv şəkildə, ədalətli formada proseslərə daxil olması hər iki tərəfin qəbul etdiyi məqamdır. Ümid edirik ki, bu çox çətin məsələnin həllində nailiyyətlər əldə olunacaq".
