İran ABŞ-la danışıqlarda diplomatiyaya şans verir.
APA xəbər verir ki, bu barədə İran Xarici İşlər Nazirliyinin sözçüsü İsmayıl Bəqai sosial media hesabında yazıb.
“Ciddi və səmimi sayıqlıqla biz diplomatiyaya əsl şans veririk”, - o bildirib.
Diplomat qeyd edib ki, ABŞ İranın dialoqa razılıq verməsini qiymətləndirməlidir: “ABŞ üstünlük təşkil edən qarşıdurma halına baxmayaraq, formalaşan bu qərarı dəyərləndirməlidir”.
Onun sözlərinə görə, İran tərəfi şənbə günü aparılacaq danışıqlarda ABŞ-ın mövqeyini qiymətləndirdikdən sonra cavab verəcək.
“Biz qarşı tərəfin niyyətini qiymətləndirəcəyik. Buna uyğun olaraq düşünüb cavab verəcəyik”, – Bəqai əlavə edib.
Qeyd edək ki, sabah Omanda İran və ABŞ arasında danışıqlar keçiriləcək. Danışıqlara İran xarici işlər naziri Abbas Araqçi və ABŞ Prezidentinin xüsusi nümayəndəsi Stiven Uitkoff rəhbərlik edəcək.
