Yaponiyada yaşlı insanlar həbsxanaya düşmək üçün qəsdən cinayətlər törətməyə başlayıblar.
Teleqraf.com xəbər verir ki, bu barədə "CNN" məlumat yayıb.
Jurnalistlərin məlumatına görə, 2003-cü ildən 2022-ci ilə qədər 65 və daha yuxarı yaşda olan məhbusların sayı təxminən dörd dəfə artıb. Belə ki, yaşlı qadınlar həm tənhalıqla üzləşməmək üçün, həm də yaxşı şərait üçün həbsxana axtarışındadırlar.
Yaponiyada cəzaçəkmə yerlərində ahıllara müntəzəm yemək verilir, tibbi xidmət göstərilir, eləcə də ünsiyyət üçün şərait yaradılır.
Bildirilir ki, bəzi yaşlı məhbuslar daimi olaraq həbsxanada qalmaq imkanı üçün ayda 130-190 dollar ödəməyə hazırdırlar.
81 yaşlı Akie yemək oğurladığı üçün həbsxanaya düşüb. Onun sözlərinə görə, həbsxanada özünü ilk dəfə təhlükəsiz hiss edib. Bundan əvvəl qadın tənhalıqdan əziyyət çəkib və bircə pensiyası ilə dolanıb.
CNN-in məlumatına görə, Yaponiya hakimiyyəti yaşlı insanlar azadlığa buraxıldıqdan sonra onlara dəstək proqramları yaratmaqla problemi həll etməyə çalışır. Bu tədbirlərə müstəqil həyat bacarıqlarının öyrədilməsi, ailə əlaqələrinin bərpası və tək pensiyaçılara mənzil subsidiyalarının verilməsi daxildir.
