Türkiyənin müxalif Cümhuriyyət Xalq Partiyasının (CHP) 38-ci qurultayına dair “şübhəli məqamlar” iddiasına görə əlaqələri kəsilən Kamal Kılıçdaroğlu və Özgür Özəl arasında bu dəfə görüş gərginliyi yaşanır.
Teleqraf xəbər verir ki, bu barədə Türkiyə KİV məlumat yayıb.
Məlumata görə, CHP sədri Özgür Özəl keçmiş sədr Kamal Kılıçdaroğludan görüşlə bağlı razılıq ala bilmir. Özəl son bir həftə ərzində üçüncü şəxslər vasitəsilə Kılıçdaroğludan görüşlə bağlı razılıq almağa çalışsa da, CHP-nin sabiq sədri iş qrafikini və tətilini əsas gətirərək bunu rədd edib.
Ətraflı
CHP-nin 38-ci qurultayı ilə bağlı pozuntu iddiaları Kamal Kılıçdaroğlu və komandasının yenidən partiya rəhbərliyinə qayıdacağı ehtimalını gündəmə gətirib. Məlumata görə, iddia məhkəmədə təsdiqini tapsa, bu, ehtimal real olacaq.
Xatırladaq ki, CHP-nin 38-ci qurultayı 4-5 noyabr 2023-cü il tarixlərində keçirilib. Qurultayda Özgür Özəl qalib gələrək, Kamal Kılıçdaroğlunun 13 illik sədrliyinə son qoyub. Qurultaydan sonra səsvermədə pozuntu iddiası ilə cinayət işi açılıb. Ankara Baş Prokurorluğu tərəfindən aparılan və artıq yekunlaşan istintaqda Kamal Kılıçdaroğlu zərərçəkən kimi tanınıb.
