Ukrayna Prezidenti Volodimir Zelenski amerikalı həmkarı Donald Trampın Rusiya-Ukrayna müharibəsini “parkda iki uşağın davası” adlandırmasına münasibət bildirib.
Teleqraf xəbər verir ki, bu barədə o, ABC telekanalına müsahibəsində deyib.
Jurnalistin “Tramp Ukraynadakı iztirabların miqyasını başa düşürmü” sualına Zelenski belə cavab verib: “Biz Putinlə parkdakı oyun meydançasında uşaq deyilik. O (Putin), uşaqları öldürmək üçün bu parka gəlmiş qatildir”.
Zelenskinin sözlərinə görə, Tramp ukraynalıların bu ağrısını tam hiss edə və anlaya bilmir:
“Söhbət prezident Trampdan getmir, söhbət burada olmayan, bizdən minlərlə mil uzaqda yerləşən ölkədə yaşayan hansısa bir şəxsdən gedir – onlar bu ağrını tam hiss edə və anlaya bilmirlər”.
Prezident qeyd edib ki, Ukraynada genişmiqyaslı işğalın başlanmasından indiyədək 631 ukraynalı uşaq həlak olub və Rusiya dinc əhalini hədəfə alır.
