Yaxın zamanlarda Ermənistana qarşı İran və Rusiyanın ciddi təsirlərini müşahidə edə bilərik
"Zəngəzur dəhlizi məsələsi 10 noyabr bəyanatında razılaşdırılıb. Azərbaycan, Rusiya və Ermənistanın iştirakı ilə bu məsələ haqda razılığa gəlinib. Ona görə də bu barədə müzakirələr aparılır".
Bu barədə Milli Cəbhə Partiyasının sədr müavini, siyasi şərhçi Tural İrfan "Sherg.az"a açıqlamasında deyib.
Ekspert bildirib ki, dəhliz məsələsi üçtərəfli qaydada danışılıb və razılıq əldə edilib:
"İrəvanın məsələni mümkünsüz hala gətirməsindən belə çıxır ki, Ermənistan "quyruğu qapı arasında qaldığı" üçün müharibəni dayandırmaq üçün söz verib. İndi də Qərblə münasibətləri sıxlaşdırandan və ABŞ ilə müəyyən sənədlər imzalayandan sonra Zəngəzur dəhlizindən imtina edir. Əlbəttə, Rusiyanın narahat olması Azərbaycan naminə yox, öz maraqları üçündür. Bu narahatlıq son zamanlar Ermənistanın Qərbə daha çox yaxınlaşması ilə bağlıdır. Vaxtilə Rusiya Azərbaycana qarşı da eyni addımları atıb. Rusiya mediasında Qarabağ "Ermənistan ərazisi" kimi, yaxud "Artsax" adı ilə qeyd edilib. Xankəndi şəhəri "Stepanakert" şəklində yazılıb. Ermənistanın indi Rusiyaya nota verməsi anlaşılan deyil. Amma Rusiyanın mövqeyini izah etmək olar. Moskva açıq formada Ermənistana demək istəyir ki, Qərbə doğru getdikcə ona qarşı təzyiqləri artıracaq. Ermənistan isə Qərbə nümayiş etdirməyə çalışır ki, onlara sadiqdir və ikili standartlarla siyasət yürütmür".
Siyasi şərhçi vurğulayıb ki, bu cür davam edərsə, Rusiya-Ermənistan arasında münasibətlər kəskinləşəcək:
"Hətta Ermənistanın İranla da münasibətlərinin pisləşməsi gözlənilir. Bunun nəticəsində Qərb, Rusiya və İran arasında qalan Ermənistanı daha ciddi müdafiə etməyə məcbur olacaq. Zəngəzur dəhlizinin açılması isə gərginləşməyə doğru gedən münasibətləri qarşılıqlı maraqlar naminə düzəldə bilər. Amma buna İran da razı deyil. Odur ki, Ermənistanla Rusiya və İran arasındakı kəskinləşən münasibətlərdən Azərbaycan faydalana bilər. Rusiyanın təyyarəmizi vurması ilə bağlı məsələlər Azərbaycanın tələblərinə uyğun olaraq həllini taparsa, Zəngəzur məsələsində Ermənistanı buna məcbur etmək mümkündür. İranın bu məsələyə etirazını da Rusiyanın təzyiqi ilə dəf etmək mümkündür. Ancaq öncə Rusiyanın Azərbaycan təyyarəsinin vurulması ilə bağlı məsələdə həqiqəti etiraf etməsi və tələbləri qarşılaması lazımdır. Zəngəzur dəhlizinin açılması mütləqdir. Sadəcə burada Rusiya və Qərb hərəsi öz nəzarətinin olmasını istəyir. Əsl rəqabət onun uğrundadır. Ermənistan isə Qərbin, əsasən də ABŞ-nin öz ərazisində yerləşməsini istəyir. Yaxın zamanlarda Ermənistana qarşı İran və Rusiyanın ciddi təsirlərini müşahidə edə bilərik".
