İsveçrənin Jura Kantonu parlamenti 2023-cü ilin sonunda sürülərin qorunmasında eşşəklərin istifadəsinə icazə verilməsini nəzərdə tutan təklifi qəbul etmişdi. Lakin Federal Qida Təhlükəsizliyi və Baytarlıq İdarəsi (OSAV) bu təklifi araşdıraraq mövcud qanunvericiliyə uyğun olmadığını bildirib.
Sherg.az xəbər verir ki, mövcud qaydalara görə, at, eşşək və oxşar heyvanların təkbaşına saxlanılması qadağandır. Halbuki eşşəklərin sürüləri qoruya bilməsi üçün təkbaşına olması vacibdir. Buna görə də, sürü qorumasında eşşək istifadəsi qadağan olunacaq.
Hökumət, yerli miqyasda tətbiqin müəyyən fayda göstərməsinə baxmayaraq, qanuni əsasın olmadığı üçün layihədən imtina edilməli olduğunu açıqlayıb. Araşdırmalara görə, bura gətirilən eşşəklər nəmli iqlimə uyğunlaşa bilmir, xüsusi yem və təzə suya ehtiyac duyur.
Üstəlik, elmi cəhətdən eşşəklərin yırtıcılara qarşı təsirli müdafiə vasitəsi olduğu sübut edilməyib.
Eşşəklər, Şimali Amerika, Avstraliya və bəzi Avropa ölkələrində sürülərin qorunmasında istifadə edilir.
