Alimlər buzlaqların əriməsinin təbiət hadisələrini artıra biləcəyi xəbərdarlığı edib.
“Sherg.az” “Milliyet.com.tr”yə istinadən bildirir ki, ABŞ-nin Kolorado Universitetindən aspirant Tao Yuan və professor Şijie Zhongun rəhbərlik etdiyi yeni araşdırma son Buz dövrünün sonunda buzlaqların sürətli əriməsinin qısamüddətli, lakin dərin iqlim dəyişikliyinə səbəb olduğunu göstərib. Tapıntılara görə, təxminən 12.000 ilə 6.000 il əvvəl Orta Atlantik silsiləsində dəniz dibinin yayılma sürəti 40 faizə qədər artıb. Tədqiqatçılar buzlaqların əriməsinin Yer qabığına təkcə şaquli deyil, həm də üfüqi istiqamətdə təsir etdiyini bildiriblər. Bu, Şimali Amerika plitəsinin bir qədər fırlanmasına və dəniz dibində daha çox okean qabığının formalaşmasına səbəb olub. Modelləşdirmə məlumatlarına əsaslanan araşdırma, eyni dövrdə İslandiyada da vulkanik aktivliyin əhəmiyyətli dərəcədə artdığını müəyyən edib. Tədqiqatçılar vurğulayıb ki, keçmiş buzlaqların əriməsi ilə əlaqəli vulkanik artımlar bu gün Qrenlandiyada buzlaqların əriməsi ilə oxşar təsirlərə malik ola bilər. Tədqiqatın aparıcı müəllifi Tao Yuan bildirib ki, buzlaqların əriməsi gələcəkdə dəniz dibinin yayılmasını və orta okean silsilələrində vulkanik aktivliyi artıra bilər. Bununla belə, bu təsirlərin üzə çıxması əsrlər çəkə bilər".
