Bizi bol qollu və gərgin keçəcək bir qarşılaşma gözləyir
UEFA Çempionlar Liqasının 3-cü turunda "Qarabağ"la qarşılaşmaya hazırlaşan İspaniyanın "Atletik Bilbao" klubu "TikTok" sosial şəbəkəsində diqqətçəkən video yayımlayıb.
Kadrlarda İspaniya klubunun ulduz hücumçusu İnyaki Uilyams "Yaşa, Azərbaycan" mahnısının sədaları altında azarkeşləri ilə mehriban ünsiyyət qurur və avtoqraf verir. Videoda "Qarabağ"ın fanatları da görüntülənir.
Bu paylaşımla "Atletik" nəinki qarşıdakı matça marağı artırıb, həm də rəqibinə hörmətini nümayiş etdirib.
Xatırladaq ki, "Atletik Bilbao" - "Qarabağ" oyunu oktyabrın 22-də, Bakı vaxtı ilə saat 20:45-də baş tutacaq.
"Səbail"in baş məşqçisi Şahin Diniyev Sherg.az-a deyib ki, Çempionlar Liqasında asan oyun olmur:
"“Atletik Bilbao” öz azarkeşləri ilə tanınan komandadır və artıq qarşıdakı oyun üçün bütün biletlər satılıb. Güman edirəm ki, komanda bu dəfə daha ciddi çıxış edəcək və “Qarabağ”ı əvvəlki kimi barmaqarası qəbul etməyəcək.
İndiyədək bəziləri “Qarabağ”a yetərincə ciddi yanaşmırdı, amma artıq vəziyyət dəyişib. “Atletik Bilbao”nun Çempionlar Liqasında iki çətin oyunu olub. Rəqibləri “Arsenal” və “Borussia Dortmund” kimi güclü komandalar idi. Bu dəfə isə ispan klubu doğma meydanda mütləq qələbə qazanmaq istəyəcək. Bununla belə, “Qarabağ” da sıradan rəqib deyil. Komanda həm səfərdə, həm də ev oyunlarında maksimum nəticəyə nail olmaq potensialına malikdir. Bizi bol qollu və gərgin keçəcək bir qarşılaşma gözləyir. “Qarabağ”ın uğurları meydançada öz sözünü deyəcək".
