Türkiyə kimlə necə rəftar edəcəyini yaxşı bilir
PKK-YPG və İŞİD kimi terror təşkilatlarının tarixin zibilliyinə atılacağı şərait yetişib
"Hər kəs əlini Suriyadan çəksin, həm İŞİD-i, həm də YPG-ni ən qısa zamanda darmadağın edəcək gücümüz var". Bunu Türkiyə Prezidenti Rəcəb Tayyip Ərdoğan deyib. Ərdoğan bildirib ki, suriyalı qardaşları ilə İŞİD, YPG və digər terror təşkilatlarının başları qısa zamanda əziləcək: "Suriyanın təbii sərvətlərini zəbt edən YPG silahı yerə qoymasa, gözlənilən aqibətdən xilas ola bilməyəcək. Kürd qardaşlarımızın bütün məsələlərini dəstəkləyirik, izləyirik, onların təhlükəsizliyinin qarantıyıq". Türkiyə Milli Kəşfiyyat Təşkilatı (MİT) İraqda da əməliyyat keçirib. PKK-nın İran qolu YRK-nın qurucularından olan Amed Serhed kod adlı terrorçunu mühafizəçisi ilə birlikdə Süleymaniyyədə zərərsizləşdirib.
Politoloq Azər Qasımov "Sherg.az"a deyib ki, Yaxın Şərq regionunun geosiyasi arxitekturasının dəyişilməsi ilə müşayiət olunan Suriyada hakimiyyət dəyişikliyi Türkiyənin əlini gücləndirib. Ekspertin sözlərinə görə, bununla yanaşı, PKK-YPG və İŞİD kimi terror təşkilatlarının da tarixin zibilliyinə atılacağı şəraiti meydana çıxarıb:
"40 ildən çox Türkiyənin terror bəlasına düçar edilməsi prosesinin sonu gəlib. Türkiyə öz sərhədlərindəki terror təşkilatlarının varlığına son qoymaqda israrlıdır. Terror təşkilatlarının arxasında kimlərin olmasından asılı olmayaraq, onların köklərinin tamamilə kəsiləcəyi gün çox yaxındır. Türkiyə əlinə keçmiş bu tarixi məqamı boşa verməyəcək. Bununla kürd xalqını da terrorçulardan azad edəcək. Hesab edirəm ki, Türkiyə heç vaxt Suriyada federal dövlət qurulmasına razı olmayacaq. Belə olarsa, Qərb, dolayısı ilə PKK Suriya ərazisində söz sahibi ola bilər. Türkiyə Suriyanın ərazi bütövlüyünü qorumaqla bütün terror qruplarını və onların dəstəkçilərinin planlarını pozacaq".
Analitik vurğulayıb ki, Türkiyə artıq Yaxın Şərqdə söz sahibi kimi öz tələblərini diktə edən tərəfdir: "Türkiyənin tələbləri eyni zamanda beynəlxalq hüququn da tələbləridir. Ona görə də hər kəs bu tələblərə əməl etməyə, Suriyanın ərazi bütövlüyünün qorunmasına dəstək olmağa borcludur. Əks halda Türkiyə onlarla necə rəftar edəcəyini yaxşı bilir".
