“Ayağına heç dəniz suyu dəyməmiş, Marmara dənizini tanımayan bir adam danışırsa, mən nə edim”?
23 apreldə İstanbulda baş verən 6.2 bal gücündəki zəlzələdən sonra, alimlərin bir-birinə zidd açıqlamaları müzakirə mövzusudur. Bəziləri zəlzələnin əsas zəlzələ olduğunu, bəziləri isə böyük zəlzələnin xəbərçisi olduğunu deyir.
Sherg.az xəbər verir ki, müzakirələr, uzun müddətdir Marmara dənizində zəlzələ araşdırmaları aparan Professor Naci Görürə yönəldilib.
Kafa TV-də canlı yayına qatılan Görür belə danışıb:
“Ayağına heç dəniz suyu dəyməmiş, Marmara dənizini tanımayan bir adam danışırsa, mən nə edim? Mənim iştirak etdiyim layihələrdə təsiri yüksək olan elmi jurnallarda məqalələr dərc olunub. Elmi dünya parçalanmayıb. “İstanbulda zəlzələ riski bitdi” deyənlər hansı elmi jurnalda dərc olunubsa, qoysunlar qabağımıza.”
Görür qeyd edib ki, yer elmləri üzrə alimlər ehtimallara əsaslanaraq məlumat verir və əksini deyənlər elm dünyasına aid deyil. O həmçinin bildirib ki, beynəlxalq səviyyədə elmlə məşğul olan alimlər Türkiyədə barmaqla sayılacaq qədər azdır.
Professor Dr. Görür bəzi şəxslərin də hiyləgərlik etdiyinə diqqət çəkib. Son dərc olunan məqalədə İstanbulda 30 il ərzində zəlzələ ola biləcəyi ehtimalının yer aldığını qeyd edən Görür deyib:
“Bu proqnozun üst-üstə 15 il fərqi var. Amma adam çıxıb xalqa deyir ki, “45 il sonra zəlzələ olacaq”. Bu məlumatı nə bir araşdırmaya, nə də bir dərcə əsaslandırır.”
“Böyük İstanbul zəlzələsinə dair tarix vermək falçılıqdır” deyən Görür sözlərini belə davam etdirib:
“Biz yalnız ehtimal kimi danışa bilərik. Son araşdırmalardan sonra 1999-dan bu günə zəlzələnin olma ehtimalı 47 faizdir. “Bu işi mən bilirəm” deməməlisən. Elmi dəyərlərə əsaslanaraq danışmaq məcburiyyətindəsən. Sən elmi dünyaya danışırsan, elm bunu gözləyir. Şəxsi niyyətlər yerinə daha dürüst olub xalqı maarifləndirməliyik. Hansı məntiq və düşüncə ilə ‘burada zəlzələ olmaz’ deyirlər?”
İstanbulda böyük zəlzələ üçün yetərli enerji toplanmadığını iddia edənlərə də toxunan Görür, bu fikri deyənin alim ola bilməyəcəyini bildirib. Beynəlxalq jurnallarda yayımlanan son araşdırmadan danışan Görür deyib:
“Dünyanın ən nüfuzlu jurnallarından birində dərc olunmuş məqalə var. Deyir ki, “30 il ərzində ehtimal 47 faizdir”. İndi sən çıxıb bu ola bilməz deyirsənsə, bunun bir mənası varmı? Əgər deyirsənsə ki, “yetərli deyil, 60 ildən sonra olacaq”, bəs hanı sənin məqalən? Otur onu yaz.”
