“Bufer zonanın yaradılması ideyası ölüdür, heç kim rəsmi Kiyevə belə bir təklif verməyib”.
Teleqraf xəbər verir ki, bunu Ukrayna Prezidenti Volodimir Zelenski deyib.
“Əvvəlcə atəşkəs, sonra hər şey... Xüsusilə demilitarizasiya zonası, bufer zona, qoşunların cəbhə xəttindən çıxarılması ilə bağlı çoxlu təfərrüatlar var. Mən bu barədə mediada, eləcə də bir çox müxtəlif insanlar və müxtəlif kəşfiyyat orqanlarından eşitmişəm. Rəsmi olaraq heç kim Ukraynaya belə bir şey təklif etməyib, amma hamı bizimlə hansısa imkanlar, başqa təcrübələr axtarır. Bu ideya ölüdür”, - Zelenski bildirib.
Xatırladaq ki, ABŞ prezidentinin xüsusi nümayəndəsi Keyt Kelloq bundan əvvəl həm Ukrayna, həm də Rusiyanın nəzarətində olacaq demilitarizasiya zonası ideyasını səsləndirib. Onun sözlərinə görə, 30 günlük atəşkəs bu baxımdan həlledici amil ola bilər.
Kelloq istisna etməyib ki, indiki cəbhə xətti boyunca müharibə dondurula və bu xətt boyunca daim nəzarətdə saxlanıla bilən müvəqqəti hərbsizləşdirilmiş zona yaradıla bilər.
