Məhəmməd Əsədullazadə: “Rusiyanın məqsədi Qərbi parçalamaq idi, amma özü təcrid olunur!”
Avropa İttifaqının (Aİ) daimi nümayəndələri Rusiya əleyhinə sanksiyaların 18-ci paketi ilə bağlı razılığa gəliblər. Bu barədə “X” sosial şəbəkədəki səhifəsində Aİ-nin xarici işlər və təhlükəsizlik siyasəti üzrə Ali Nümayəndəsi Kaya Kallas məlumat verib. Avropa diplomatiyasının rəhbəri qeyd edib ki, məhdudlaşdırıcı tədbirlər siyahısına “Şimal axını” və “Şimal axını 2” qaz kəmərlərinə məhdudiyyətlər, həmçinin Rusiya neftinə yeni qiymət həddinin tətbiqi daxildir.
Möhkəm dayandıqlarını vurğulayan K.Kallas qeyd edib ki, Aİ bu günə qədər Rusiyaya qarşı ən sərt sanksiya paketlərindən birini təsdiqləyib.
Politoloq Məhəmməd Əsədullazadə isə Sherg.az-a açıqlamasında Avropa İttifaqının və ABŞ-nin Rusiyaya qarşı sərt xətt siyasətinin yeni müstəviyə keçdiyini vurğulayıb. M.Əsədullazadə deyib ki, qətnamənin qəbuluna Slovakiya və Macarıstan veto qoyurdu:
“Slovakiya Baş naziri qaz qiymətləri ilə bağlı Avropa Komissiyası ilə razılıq əldə etdikdən sonra, milli maraqlara uyğun olaraq bu qətnaməni dəstəkləyib. Macarıstan Baş naziri V.Orban isə Avropa İttifaqını tərk edəcəyi mesajını verib. Bu iki ölkə Ukraynaya hərbi və maliyyə yardımlarına qarşı olaraq Avropa İttifaqının birliyinə zərbə vururdu. Artıq Avropa İttifaqı hərbi və iqtisadi cəhətdən güclənərək hər iki ölkəni sıxışdıraraq Rusiyaya qarşı kəskin qətnamənin qəbuluna nail oldu”.
Politoloq bildirib ki, Avropa İttifaqının (Aİ) Rusiyaya qarşı 18-ci paketi Rusiya bank sektorunu, enerji sahəsini və hərbi-sənaye kompleksini hədəf alır. Həmçinin neft üçün yeni dinamik qiymət həddi də nəzərdə tutulur:
“Aİ rəhbərliyi bildirib ki, məqsəd Rusiyanın müharibə imkanlarını zəiflətməkdir. Təbii ki, bu sanksiyalar Rusiyanın neft sektoruna ciddi şəkildə mənfi təsir edəcək. Demək olar ki, Qərb Rusiyaya qarşı ciddi hərbi-siyasi və iqtisadi koalisiya formalaşdırır. Rusiyanın Ukraynaya hərbi hücumunda əsas planı Qərbin birliyini və təhlükəsizlik arxitekturasını dağıtmaq idi. Hazırda Qərb daha da konsolidasiya olaraq Rusiyaya qarşı möhkəmlənir. Bununla da, Avropa İttifaqı yeni hərbi və siyasi mərkəz kimi geosiyasi mövqelərini gücləndirir. Eyni zamanda, Rusiyaya iqtisadi və hərbi təzyiqləri artıraraq Ukraynada strateji məğlubiyyətə uğradır”.
