Cənubi Qafqazda rus hərbi bazalarının sona çatması qaçılmazdır
Rusiya Xarici İşlər Nazirliyi "Tramp Marşrutu" layihəsinin (Ermənistan ərazisindən keçəcək Zəngəzur dəhlizi - red.) detallarını öyrənmək niyyətindədir. Bu barədə Rusiya XİN-in İnformasiya və Mətbuat Departamentinin direktor müavini Aleksey Fadeyev bildirib. Onun sözlərinə görə, Mariya Zaxarovanın avqustun 9-da dərc olunmuş şərhində hər şey açıq şəkildə öz əksini tapıb: "Biz bu mövqedən çıxış edirik. Rusiya, Azərbaycan və Ermənistan liderləri arasında 2020-2022-ci illərdə imzalanmış üçtərəfli sazişlər toplusuna gəlincə, onlar aktuallığını qoruyub saxlayır, çünki tərəflərdən heç biri onlardan geri çəkilməyib. Biz Ermənistanın bütün sahələrdə normallaşmasına yardım etməyə hazırıq.
Bunu həm nazirliyin rəhbərliyi, həm də ölkə rəhbərliyi dəfələrlə bildirib. "Tramp yolu"na gəlincə, belə demək mümkünsə, öz mövqeyimizi qoruyuruq. Rusiya Xarici İşlər Nazirliyi hələlik ictimaiyyətə açıqlanmayan layihənin təfərrüatlarını öyrənəcək. Artıq qeyd etdiyimiz kimi, Cənubi Qafqazda bu işə xarici qüvvələrin cəlb edilməsi sülh gündəminin irəliləməsinə təkan verməli, yeni problemlər və bölücü xətlər yaratmamalıdır". Rusiya rəsmisi qeyd edib ki, Ermənistanın Avrasiya İqtisadi Birliyinə üzvlüyü və Sünik bölgəsində Rusiya sərhədçilərinin olması kimi amillərin də nəzərə alınması zərurətini bəyan ediblər: "Regionda nəqliyyat kommunikasiyalarının blokdan çıxarılması ilə bağlı qərarlar hazırlanarkən və qəbul edilərkən bu hallar nəzərə alınmalıdır".
Vəhdət Partiyasının sədrinin müavini Vasif Əfəndiyev Sherg.az-a deyib ki, əgər Zəngəzur dəhlizi İranla sərhəd bölgəyə yaxın ərazidən keçərsə, əvvəllər orada mövcud olmuş Rusiya hərbçiləri, hərbi bazaları nəzərə alınmalı idi. Ekspertin sözlərinə görə, 2025-ci ilin yanvar ayının 1-dən etibarən rus sərhədçiləri İranla sərhədi tərk ediblər:
"Bu missiyanı Ermənistan Milli Təhlükəsizlik Xidmətinin sərhəd qoşunları həyata keçirir. Onlar 2025-ci ildən mühafizənin bütün məsuliyyətini öz üzərlərinə götürüblər. Sərhəd bölgəsində problemin olmayacağı qənaətindəyəm. Rusiya sərhədçiləri Türkiyə və İran sərhədlərində birgə patrul xidmətini həyata keçirəcəklər. Avqust ayının 15-də planlaşdırılan Tramp-Putin görüşündə Ukrayna məsələsi ilə yanaşı, indi “Tramp dəhlizi “ adlanan “Zəngəzur dəhlizi” barədə də razılaşmanın olacağını ehtimal edirəm. İran və Rusiya bu dəhlizdən əldə olunacaq mənfəəti ayıq başla təhlil etsələr, anlayarlar ki, mane olmaq əvəzinə prosesə dəstək vermək lazımdır. Yaxın gələcəkdə Rusiya hərbi bazasının Cənubi Qafqazdan tamamilə çıxacağı qaçılmaz faktdır. Rusiyanın Ukrayna ilə uzunmüddətli münaqişənin fəsadları özünü göstərəcək. Bu, ölkənin xaricdə hərbi baza saxlamaq iqtidarının olmamasına gətirib çıxaracaq".
