Bu halda, Rusiya dəhlizin açılmasına ciddi mane olacaq və İranla eyni mövqedən çıxış edəcək
Rusiyanın xarici işlər naziri Sergey Lavrov Moskvada İrəvanı Zəngəzurla təhdid edib. Lavrovla ermənistanlı həmkarı Ararat Mirzoyan arasında keçirilən Moskva görüşünü dəyərləndirən erməni politoloqların iddiasına görə, görüşdə Rusiya tərəfinin Sünikdə (Zəngəzur – red.) konsulluq açması və ümumilikdə Ermənistandakı diplomatik nümayəndəliklərin genişləndirilməsi təklif olunub. Lakin Mirzoyan hər iki təklifə etiraz edib və bəyənmədiyini bildirib. Təklifləri rədd edən Mirzoyan Sünikin ruslaşmasının ermənilərə lazım olmadığını, orada nə qədər az rus olarsa, o qədər yaxşı olduğunu bəyan edib. Lavrov isə bildirib ki, Sünik Ermənistanın tərkibində qalmasa, bu, ölkənin sonu olacaq.
Rusiya ilə Ermənistan arasındakı münasibətləri, Zəngəzur dəhlizi üzərində oynanılan oyunları şərh edən siyasi şərhçi Vüqar Dadaşov isə “Sherg.az”ə açıqlamasında bildirib ki, Zəngəzur dəhlizi ilə bağlı qeyri-müəyyənlik Donald Tramp və Vladimir Putinin razılaşıb, razılaşmayacağından asılıdır. Onun fikrincə, indiki vəziyyətdə Ermənistanla Azərbaycan arasında sülh müqaviləsi bəndlərindən çıxarılmış Zəngəzur dəhlizi məsələsi, ən azı sülh müqaviləsinin özü qədər çətin razılaşma predmetinə çevrilib:
“ABŞ Ermənistan arasında strateji tərəfdaşlıq sazişinin imzalanmasından sonra, ABŞ Aİ-nin Ermənistanda mülki missiya adı altında yerləşdirdiyi yarım-hərbi qüvvələrinə bir qrup ilə qoşulması ABŞ-nin Ermənistanda oturuşması üçün ciddi addımdır. Həmçinin ABŞ Zəngəzur dəhlizinə nəzarət edəcəyini planlaşdırır və bu yanaşma Ermənistanı da tam qane edir.
Rusiya isə bu planın əleyhinədir. Rusiya birmənalı Zəngəzur dəhlizinin açılışına və ona nəzarəti 10 noyabr Moskva Bəyannaməsi çərçivəsində həllinin tərəfdarıdır. Əks halda, Rusiya Zəngəzur dəhlizinin açılmasına ciddi mane olacaq və İranla eyni mövqedən çıxış edəcək. Moskvada Rusiya-İran strateji tərəfdaşlıq sazişindən sonra, Rusiya və İranın birlikdə Zəngəzur dəhlizinin qəti əleyhinə gedəcəyi və onun nəzarətindən kənar açılmasına bütün imkanlarla mane olacağı şübhəsizdir. Moskvada Ermənistanın xarici işlər naziri Ararat Mirzoyan və Rusiyanın xarici işlər naziri Sergey Lavrovun görüşünün də əsas mövzularından biri məhz Zəngəzur dəhlizi ilə bağlı idi. ABŞ-nin Ermənistanla sözügedən sazişi Co Bayden administrasiyası tərəfindən imzalanıb, prezident səlahiyyətlərinə yenidən başlamış Donald Tramp administrasiyasının isə bu sazişə eyni yanaşma göstərəcəyi sual altındadır və hətta Donald Trampın ABŞ-Ermənistan arasındakı strateji tərəfdaşlıq sazişini geri cevirəcəyi ehtimalını da tam istisna etmək olmaz. Lakin hazırlaşılan görüşdə Donald Tramp Vladimir Putinlə razılaşarsa, ABŞ və Ermənistan arasındakı saziş əhəmiyyətsiz olacaq”.
