Ekspertin sözlərinə görə, bu, Rusiya-Ukrayna savaşının ən azından hələ bir müddət də davam edəcəyi ehtimalını gücləndirir
AB liderləri Brüsseldə keçirilən sammitdə Avropa Komissiyasının təklif etdiyi 800 milyard avroluq Avropanın hərbiləşdirilməsi planı üzrə razılığa gəliblər. Liderlər Avropa Komissiyasının müdafiəni gücləndirmək planını təsdiqləyiblər. Macarıstan Baş naziri Viktor Orban deyib ki, Avropa Birliyinin sammitində qəbul edilən yenidən silahlanma planı Almaniyanın II Dünya müharibəsindən sonra ən böyük ordu yaratmasına səbəb olacaq: "AB ölkələrinin müdafiəsinin gücləndirilməsi silahlı qüvvələrinin təkmilləşdirilməsi və hərbi sənayesinin inkişafına yönəlib. Buna görə Almaniya ordusu Avropanın ən böyük ordusu olacaq". Kremlin mətbuat katibi Dmitri Peskov isə deyib ki, Avropa Birliyi özünü Rusiyanın düşməni kimi göstərir. Ona görə də Avropa Birliyinin yenidən silahlanması və ya militarizasiyası Moskvanı narahat etməyə bilməz: "Biz görürük ki, AB hazırda özünün müdafiə sistemlərinin hərbiləşdirilməsi və inkişaf etdirilməsi perspektivlərini kifayət qədər fəal şəkildə müzakirə edir. Bu, bizim yaxından izlədiyimiz bir prosesdir, çünki AB Rusiyanı özünün əsas rəqibi hesab edir". Avropa Komissiyasının(AK) rəhbəri Ursula fon der Lyayen bu addımın təhlükəsiz və dayanıqlı Avropa üçün atıldığını bildirib.
Siyasi şərhçi Elvin Baxşalızadə "Sherg.az"a deyib ki, Avropa İttifaqı həm öz təhlükəsizliyi, həm də Ukraynaya dəstək mövzusunda geri addım atmayacaq. Ekspertin sözlərinə görə, bu isə Rusiya-Ukrayna savaşının ən azından hələ bir müddət də davam edəcəyi ehtimalını gücləndirir:
"İndiki məqamda nə Rusiya, nə də Ukrayna tərəfi hansısa ciddi kompromisə hazır görünür. Çünki hər iki tərəf üç ildən çox davam edən savaşda yüz minlərlə hərbçisini itirib. Bu kontekstdə qarşı tərəfə ediləcək hansısa güzəşt daxili auditoriyada böyük narazılıqla qarşılanacaq. Bundan başqa, son dövrlərdə Avropa İttifaqının bir neçə rəsmisi açıq şəkildə Rusiyanın qitə üçün ən ciddi təhdid olduğunu qeyd edib. Avropa silahlanırsa, bunun əsas səbəbi Rusiyadan gələ biləcək təhdidlərdir. ABŞ-dən fərqli olaraq Aİ Rusiya ilə qonşuluqda yerləşir. Avropa rəsmilərinin hazırkı əsas qayğısı da Rusiyanın Ukraynada hərbi qələbə qazanacağı təqdirdə rəsmi Moskvanın daha da aqressivləşəcəyi ssenarisidir".
