Dünya birjalarının gözü ABŞ Prezidenti Donal Trampın bu gecə açıqlayacağı yeni gömrük rüsumlarındadır. Xüsusilə, vergilərin qızılın qiymətini istiqamətləndirəcəyi gözlənilir.
Teleqraf xəbər verir ki, ticarət müharibəsinin rəsmən start götürməsi artıq qlobal bazarlarda təşvişə səbəb olub. Bu prosesdə təhlükəsiz sığınacaq hesab edilən qızılın dəyəri yenə də yüksəliş trendindədir. İlin ilk rübündə qiymətli metalın unsiyası 20% bahalaşıb.
Bu günkü iqtisadi şərtləri və açıqlamalar nəzərə alındıqda qızılın qiymətinin orta və uzunmüddətli dövrdə hər ay rekordu yeniləyəcəyi gözlənilir.
"Bank of America" nın analitikləri hesab edir ki, qızıl yaxın iki ildə 3500 dollara qədər bahalaşacaq. Rəylərə görə, yüksək volatillik həm də investorlar, Mərkəzi Banklar və çinli sığortaçıların artan tələbi ilə bağlıdır.
"Morninqstar"a görə, əmtəə yönümlü fondlarda fevral ayında 4,7 milyard dollar vəsait daxil olub. Bunun da 3,4 milyard dolları SPDR Gold Shares ETF-dən (GLD) daxil olub.
Ekspertlər xəbərdarlıq edir ki, ticarət tarifləri ilə bağlı iqtisadi qeyri-müəyyənlik və geosiyasi gərginlik qızılın qiymət artımını daha da sürətləndirə bilər.
Qeyd edək ki, Tramp tarifləri Bakı vaxtı ilə 00:00-da açıqlayacaq.
