1978-ci ildən bəri Hindistanda 9 dəhşətli təyyarə qəzası baş verib. Qəzaya uğrayan təyyarələrdən 5-i “Boeing 737” olub.
Teleqraf xəbər verir ki, 1978-ci ilin yanvarında Hindistanın maliyyə mərkəzi olan Mumbay sahillərində kapitanın təyyarəyə nəzarəti itirməsi və təyyarənin Ərəbistan dənizinə düşməsi nəticəsində “Air India” aviaşirkətinə məxsus təyyarə qəzaya uğrayıb. Qəza nəticəsində göyərtədəki 213 sərnişininin hamısı həlak olub.
1988-ci ilin oktyabrında "Hindistan Hava Yolları"na məxsus Mumbaydan Əhmədabada uçan “Boeing 737” təyyarəsi eniş edərkən qəzaya uğrayıb, nəticədə 130-dan çox sərnişin həyatlarını itirib.
1991-ci ilin avqustunda "Hindistan Hava Yollar"ına məxsus Kəlkütədən uçan “Boeing 737” təyyarəsi dağlıq şimal-şərqdəki Manipur əyalətinin paytaxtı İmfal yaxınlığında eniş zamanı qəzaya uğrayıb və göyərtəsində olan 69 sərnişinin heç biri sağ qalmayıb.
1993-cü ilin Aprelində Hindistan Hava Yollarına məxsus “Boeing 737” təyyarəsi qərbdəki Auranqabad şəhərində havaya qalxarkən qəzaya uğrayıb və göyərtəsində olan 55 nəfər həlak olub.
Bundan başqa, 1996-cı il Noyabrda Hindistanın Çarxi Dadri şəhəri üzərində Səudiyyə Ərəbistanı Hava Yollarına məxsus təyyarə ilə "Qazaxıstan Hava Yolları"na məxsus təyyarənin toqquşması nəticəsində 350-yə yaxın sərnişin həlak olub.
2000-ci ilin İyulunda Kəlkütə ilə paytaxt Yeni Dehli arasında dövlətə məxsus "Alliance Air" aviaşirkətinə məxsus təyyarənin şərqdəki Patna şəhərinin yaşayış massivində qəzaya uğraması nəticəsində 50-dən çox sərnişinin biri də salamat qalmayıb.
Həmçinin 2010-cu ilin Mayında Dubaydan uçan “Air India” aviaşirkətinə məxsus "Boeing 737" təyyarəsi ölkənin cənubundakı Manqaluru şəhərinin hava limanında uçuş-enmə zolağından çıxaraq dərəyə çırpılıb, nəticədə göyərtəsində olan 158 nəfər həlak olub.
2020-ci ilin Avqustunda “Air India Express” şirkətinə məxsus “Boeing 737” təyyarəsinin güclü yağış zamanı Kojikode şəhərində uçuş-enmə zolağından çıxaraq vadiyə batması və burnunun yerə çırpılması nəticəsində 21 nəfər ölüb.
Nəhayət, “Air India” aviaşirkətinə məxsus “Boeing 787-8 Dreamliner” sərnişin təyyarəsinin iyunun 12-də qəzaya uğraması nəticəsində 242 sərnişin həlak olub.
