Ermənistan tərəfi təxribatlarını davam etdirib. Mayın 13-də Ermənistan silahlı qüvvələrinin bölmələri Gorus və Çəmbərək rayonları istiqamətlərində yerləşən mövqelərindən Azərbaycan Ordusunun mövqelərini atıcı silahlardan fasilələrlə atəşə tutublar. Azərbaycanın Müdafiə Nazirliyindən bildirilib ki, bölmələrimiz tərəfindən qeyd olunan istiqamətlərdə adekvat cavab tədbirləri görülüb.
Son günlərdə şərti sərhədlərdə atəşkəsin pozulması halları intensivləşib.
Milli Cəbhə Partiyasının sədr müavini Tural İrfan "Şərq"ə açıqlamasında deyib ki, Ermənistan tərəfinin xislətininə xas atdığı təxribatçı addımlar ümumi danışıqlara və sülhə doğru yaxınlaşmalara xələl gətirməməlidir. Ekspertin sözlərinə görə, erməni tərəfi bunu ciddi düşünməlidir:
"Ermənistan baş nazirinin Rusiya səfərindən sonra bu kimi halların baş verməsi başadüşüləndir. Lakin Ermənistan həmişəki kimi öz maraqlarını düşünənlərə uymamalıdır. Azərbaycan ilə nizamlanması vacib olan mövzular üzərində işləməlidir. Görünür, Rusiyayönlü qüvvələr, eyni zamanda müxalifət hakimiyyətə basqıları artırır. Bu zaman ordu daxilindəki təxribatçı qruplar belə addımlara yol verirlər. Mümkündür ki, hakimiyyətin özü də Rusiyaya yenidən meyillənir və köhnə adətlərini təkrar etməyə həvəslənir. Amma bu, onlara baha başa gələ bilər. Rusiya Ermənistanı bu dəfə xilas edə bilməz".
Analitik qeyd edib ki, atəşkəsi həmişə erməni tərəfi pozur və bütün araşdırmalarda sübut edilir: "Onlar bir daha etməməyə söz verirlər, lakin yenidən təkrarlanır. Bu, ilk növbədə erməni siyasi xislətinin təzahürüdür. Təxribat, yalan, böhtan, təcavüz ermənilərə xas xarakterdir. Digər yöndən, rəsmi İrəvan müstəqil siyasət aparmağa qərarlı deyil. İkili standartlarla, gah Qərbə, gah Rusiyaya alət olmaqla, özünə havadar axtarmaqla etibarı, etimadı itirirlər. Əgər Ermənistan hakimiyyəti Azərbaycanla sülhdən yayınarsa, Rusiyanın, yaxud digərlərinin siyasətinə tabe olursa, bütün yönlərdə itirən özü olacaq. Nəzərdə tutulan iqtisadi layihələr, münasibətlərin tənzimlənməsindən sonrakı mərhələdə başqa sahələrdəki planlar, bölgə ölkələrinin ortaq icra edəcəkləri məsələlər, Türkiyə ilə ticari əlaqələr sual altına düşə bilər. Ona görə Ermənistan diqqətli olmalıdır".
T.İrfan əlavə edib ki, Rusiya Ermənistan vasitəsilə Azərbaycana yenidən təzyiq göstərmək istəyir: "Təyyarə olayından sonra Rusiya təxribatı etiraf etmək, üzr istəmək əvəzinə təhdid, təzyiq yolunu seçdi. Fəqət, Azərbaycan öz qüdrəti, müdrik siyasəti və güclü müttəfiqləri, tərəfdaşları ilə münasibətlər sayəsində söz və güc sahibidir. Zorla, təhdidlə, təxribatla heç nəyə nail ola bilməzlər. Ermənistan kənar təsirlərə, təxribatlara uyub yenidən onun-bunun vassalına, alətinə çevrilməsin".
