"Ermənistan iki ildir ki, Qərbi Zəngəzurda və Kəlbəcər istiqamətində şərti sərhəddə mühəndis istehkam işləri aparır. Bunkerlər və atəş sahələri yaradılır".
Bu sözləri "Sherg.az"a açıqlamasında politoloq Məhəmməd Əsədullazadə deyib.
Ekspert bildirib ki, Ermənistan Hindistandan aldığı artilleriya sistemlərini Azərbaycanla sərhəddə atəş nöqtələrində yerləşdirir:
"Avropa İttifaqının yarımhərbi "mülki missiyası" isə Ermənistanın bu hərbi hərəkətliliyinə susqunluq nümayiş etdirir. Azərbaycan Ermənistanla sərhəddə hər hansı ağır silahlar yerləşdirməyib və hərbi hərəkətlilik də yoxdur. Bunu Ermənistan tərəfi də təsdiq edib. Amma, Ermənistan tərəfi hər keçən gün Azərbaycanla sərhəddə qoşun növlərinin yerdəyişməsini həyata keçirir. Nikol Paşinyan bir tərəfdən sülh müqaviləsinin bağlanması istiqamətində açıqlamalar verir. Digər, tərəfdən müharibə hazırlığı edir. Paşinyanın hazırkı siyasətində bir neçə məqamı qeyd etmək olar. Birinci, İrəvan hökuməti Azərbaycanı "Zəngəzur dəhlizi" planından daşındırmaq istəyir. İkinci, strateji yüksəkliklərdən Azərbaycan mövqelərini çıxarmağa çalışır. Üçüncüsü isə danışıqlarda üstünlük qazanmaq niyyəti güdür. Həmçinin. Qubadlı və Zəngilan istiqamətində bir sıra əraziləri nəzarətə almaq istəyir. Bundan sonra isə Qarabağdan könüllü gedən ermənilərin geri qaytarılmasını müzakirə predmetinə gətirməyi düşünür. Bu da Qərbi Azərbaycan məsələsini gündəmdən çıxarmağa hesablanıb. Əgər, Ermənistan avantüraya gedib, Azərbaycana qarşı hərbi əməliyyatlara əl atarsa, ərazi itkilərinə məruz qalacaq".
