İran xarici işlər naziri Abbas Araqçi İrəvanda Ermənistan xarici işlər naziri Ararat Mirzoyan ilə görüşüb.
Bu barədə İran Xarici İşlər Nazirliyinin mətbuat xidməti məlumat yayıb.
Tərəflər ikitərəfli münasibətləri və Cənubi Qafqazdakı regional məsələləri müzakirə ediblər.
Qeyd edək ki, İran xarici işlər naziri Abbas Arakçı bu gün İrəvana səfər edib. Bu barədə Ermənistan mətbuatı məlumat yayıb. Onu hava limanında Ermənistan xarici işlər nazirinin müavini Vaan Kostanyan qarşılayıb. Səfər çərçivəsində onun rəsmi şəxslərlə görüşü gözlənilir.
Politoloq Natiq Miri “Sherg.az”a bildirib ki, Ermənistan rəhbərliyi indiki vəziyyətdə İranı regionda özünün yeganə təhlükəsizlik hamisi kimi görür:
“İran verdiyi açıqlamalarla bunu hər zaman bəyan edir. Eyni zamanda Ermənistanın ərazi bütövlüyünün və suverenliyinin qırmızı xətləri olduğunu söyləyirlər. Ona görə də indiki həssas vəziyyətdə bir sıra məsələlərin İran dövlətiylə müzakirə predmentinə çevrilməsinə ehtiyac var. İranın İrəvana qırmızı xətt münasibəti kontekstində Ermənistan-Rusiya əlaqələri və gələcək perspektiv müzakirə olunacaq. Ermənistanı narahat edən əsas məqamlardan biri budur. Çünki Ukrayna savaşı kontekstində Amerika və Rusiya yaxınlaşması baş verir. Prosesin isə hansı yöndə inkişaf edəcəyi ilə bağlı Ermənistanda qeyri-müəyyənlik və narahatlıqlar var. Digər bir məsələ isə Ermənistanın Azərbaycanla sülh məsələsidir. İki ölkə prinsipial olaraq sülh mətnini razılaşdırıblar. Ancaq sözügedən mətn razılaşdırılmış olsa belə, hələlik ilkin sülh sənədinin imzalanması üçün konkret qərar yoxdur. Bu məsələ fonunda İranın münasibəti Ermənistan üçün vacibdir”.
Ekspert qeyd edib ki, sülh mətninin razılaşdırılması ilə paralel Ermənistanın kommunikasiyaların açılması və Zəngəzur dəhlizinin gələcək taleyi ilə bağlı İranla müzakirələr ehtiyacı var:
“Çünki Ermənistan Zəngəzur dəhlizinin açılmasıyla bağlı qərar verməyə hazırlaşırsa, deməli, İranı bütün məqamlarla bağlı xəbardar etmək və mövqeyini öyrənmək niyyətindədir. Dövriyyədə Amerikanın yüzdən artıq hərbi texnikasının Ermənistana göndərilməsi və birgə təlimlərin baş tutması kimi məsələlər mövcuddur. Bu isə bəzi region ölkələrini, xüsusilə də Rusiyanı narahat edir. Təbii ki, bu məsələ indiki ABŞ, İsrail, İran gərginliyi fonunda Tehranı maraqlandırmaya bilməz. Hesab edirəm ki, bu məsələ kontekstində də açıqlama veriləcək və İranı narahat edən məqamın olmaması ilə bağlı nazir məlumatlandırılacaq. Türkiyə münasibətlər və sərhədlərin açılması da görüşlər zamanı müzakirə mövzusuna çevrilə bilər”.
