Suriyada müxalifət tərəfindən devrilmiş Bəşər Əsədin Londondakı bank hesabında 69,4 milyon dollar var. 2011-ci ildən bəri dondurulmuş hesaba faizlər yığılır.
“Sherg.az” xəbər verir ki, Britaniya mətbuatının bank sektorundan olan mənbələrə əsaslanan xəbərinə görə, devrilmiş lider Bəşər Əsədin Londonda dondurulmuş bank hesabında 55 milyon funt-sterlinq (69,4 milyon dollar) var.
Xəbərə görə, Əsədin şəxsi hesabına 2011-ci ildə Britaniya sanksiyaları ilə dondurulandan bəri faizlər artır.
Bankdakı pullar Əsəd ailəsi və Britaniyadakı müttəfiqlərinin əlində olan təxminən 163 milyon funt-sterlinq (205,7 milyon dollar) aktivin bir hissəsidir.
Müxaliflər Dəməşqi ələ keçirdikdən sonra Əsəd və ailəsi Moskvaya qaçıb.
Britaniyanın Teleqraf qəzeti ötən həftə Rusiyada Əsəd ailəsini çox dəbdəbəli həyatın gözlədiyini yazıb.
