İran təhlükəsizlik orqanları, İsrailin nüvə layihələri və obyektlərinə dair minlərlə strateji və məxfi sənədin əldə edildiyini, bu sənədlərin təhlükəsiz şəkildə İrana gətirildiyini bildirib.
Sherg.az xəbər verir ki, İran dövlət televiziyasına danışan təhlükəsizlik mənbələri, sənədlərin foto və video materiallarla birlikdə olduqca əhatəli məlumatlar verdiyini vurğulayıb.
Sənədlərin böyük həcmdə olduğu üçün hamısının təhlükəsiz şəkildə çatdırılmasının vaxt apardığı qeyd olunub.
Digər tərəfdən, İsrailin Shin Bet xidməti və polisi 17 gün əvvəl İranla əlaqəli təhlükəsizlik ittihamları ilə Roy Mizrahi və Almog Atias adlı iki nəfəri həbs etdiyini açıqlamışdı. Bu həbsin sənədlərin ölkədən çıxarılmasından sonra baş verdiyi güman olunur.
