İsrailin müdafiə naziri İsrael Katz, “Madlin” adlı gəminin Qəzza sahillərinə yaxınlaşmasının qarşısını almaq üçün ordunun bütün zəruri tədbirləri görəcəyini bildirib.
Teleqraf xəbər verir ki, bu barədə o "X" sosial şəbəkəsində paylaşım edib.
“İsrail Müdafiə Qüvvələrinə "Madlin" gəmisinin Qəzzaya yaxınlaşmasının qarşısını almağı əmr etmişəm. Qreta və onun HƏMAS-ı təbliğ edən dostlarına aydın mesajım var: geri dönün, Qəzzaya çata bilməyəcəksiniz”, – paylaşımda deyilir.
Nazir əlavə edib ki, İsrail blokadanı yarmaq və ya Qəzzadakı silahlı qruplaşmalara yardım göstərmək cəhdlərinin qarşısını qətiyyətlə alacaq.
Qeyd edək ki, “Madlin” gəmisi 1 iyun tarixində Siciliya sahillərindən Qəzzaya doğru yola düşüb. Gəmidə uşaq qidası, gigiyenik vasitələr, tibbi ləvazimat və digər humanitar yardım məhsulları mövcuddur. Onun Şərqi Aralıq dənizinə yaxın günlərdə çatması gözlənilir. Gəmidə tanınmış ekofəal Qreta Tunberq də daxil olmaqla 12 aktivist humanitar yardım aparır.
