Regional təhlükəsizlikdə yeni səhifə açılır
İyulun 24-də Azərbaycanın müdafiə naziri general-polkovnik Zakir Həsənov ölkəmizdə səfərdə olan İtaliya Silahlı Qüvvələrinin Baş Qərargah rəisi general Luçano Portolanonu qəbul edib. Müdafiə Nazirliyinin Mətbuat və ictimaiyyətlə əlaqələr idarəsindən verilən məlumata görə, italiyalı qonağı salamlayan müdafiə naziri onu ölkəmizdə görməkdən məmnunluğunu ifadə edib.
Hərbi əməkdaşlığın mövcud vəziyyətini müsbət qiymətləndirən nazir Azərbaycan-İtaliya münasibətlərinin daha da genişləndirilməsinin digər sahələrdə olduğu kimi hərbi sahədə də xüsusi əhəmiyyətə malik olduğunu qeyd edib.
General L.Portolano isə öz növbəsində səmimi qəbula görə general-polkovnik Z.Həsənova minnətdarlığını bildirib. Qarşılıqlı səfərlərin əhəmiyyətini diqqətə çatdıran qonaq ölkələrimiz arasında hərbi əməkdaşlığın hər iki ölkə ordusunun inkişafına töhfə verəcəyini vurğulayıb.
İtaliyanın ölkəmizdəki fövqəladə və səlahiyyətli səfiri Luka Di Canfrançeskonun da iştirak etdiyi görüşdə hərbi, hərbi-texniki, hərbi təhsil sahələrində əməkdaşlığa, həmçinin regional təhlükəsizliyə dair maraq doğuran məsələlər müzakirə olunub.
Müdafiə, təhlükəsizlik və korrupsiya ilə mübarizə komitəsinin sədri Arzu Nağıyev Sherg.az-a açıqlamasında deyib ki, bu görüş təkcə diplomatik xarakter daşımır, hərbi əməkdaşlıq və Azərbaycanın beynəlxalq sistemə inteqrasiyası baxımından da mühüm məqamları əhatə edir:
“Azərbaycan müdafiə naziri general-polkovnik Zakir Həsənovun İtaliya Silahlı Qüvvələrinin Baş Qərargah rəisi general Luçano Portolano ilə görüşü, yalnız ikitərəfli münasibətlər çərçivəsində deyil, eyni zamanda regional və qlobal təhlükəsizlik müstəvisində strateji əhəmiyyət kəsb edən hadisədir.
İtaliya NATO-nun təsisçi üzvlərindən biri olmaqla yanaşı, bu qurumun əsas hərbi və texnoloji dayaqlarından sayılır. Azərbaycanın İtaliya kimi bir ölkə ilə hərbi sahədə yaxınlaşması, NATO standartlarına uyğun fəaliyyət mexanizmlərinin daha da təkmilləşdirilməsi və Azərbaycan Ordusunun interoperabilitet (əməkdaşlıq qabiliyyəti) səviyyəsinin artırılması baxımından əhəmiyyətlidir. Bu xüsusda birgə təlimlərin keçirilməsi, zabit və əsgərlərin müxtəlif hazırlıq kurslarında iştirak etməsi, dərs mübadilələri və təcrübə paylaşımı NATO ilə əməkdaşlıqda keyfiyyətcə yeni mərhələnin başlanğıcı ola bilər”.
Deputatın sözlərinə görə, İtaliya Avropanın qabaqcıl hərbi sənaye ölkələrindən biridir və texnoloji baxımdan müasir silah sistemləri, pilotsuz uçuş aparatları, radar sistemləri, hava hücumundan müdafiə qurğuları istehsalında böyük təcrübəyə malikdir:
“Azərbaycanın müdafiə sənayesinin inkişaf etdirilməsi üçün bu təcrübədən yararlanmaq, birgə layihələr icra etmək və hətta texnoloji transfer mexanizmləri üzərində işləmək real imkanlar sırasındadır. Bu cür əməkdaşlıq Azərbaycanın hərbi-texniki müstəqilliyini daha da artırmaqla yanaşı, ölkənin müdafiə qabiliyyətini gücləndirəcək. Cənubi Qafqazda sülh və sabitliyin bərqərar olması üçün balanslaşdırılmış və praqmatik xarici siyasət yürüdən Azərbaycan, İtaliya ilə hərbi əməkdaşlıq vasitəsilə bu mövqeyini daha da gücləndirir. İtaliya Avropa İttifaqının və NATO-nun üzvü olmaqla yanaşı, Cənubi Qafqazda sülh təşəbbüslərinin dəstəklənməsi yönündə maraqlı tərəf kimi çıxış edə bilər. Bu isə regionda təhlükəsizlik təhdidlərinin qarşısının alınmasında mühüm rol oynaya bilər”.
A.Nağıyev həmçinin qeyd edib ki, görüş, sadəcə hərbi sahədə deyil, həm də strateji diplomatiya baxımından önəmlidir. Bu cür yüksək səviyyəli görüşlər dövlətlərarası etimadın artmasına, müdafiə sektorunda şəffaflığın və uzunmüddətli tərəfdaşlıq üçün zəminin formalaşmasına xidmət edir.
