Ukrayna cəmiyyəti heç vaxt Krımı Rusiya ərazisi kimi tanımayacaq.
Teleqraf xəbər verir ki, bunu hərbi ekspert, Ukrayna Silahlı Qüvvələri Baş Qərargahının mətbuat xidmətinin keçmiş rəhbəri Vladislav Seleznyov deyib.
“Bunu bəyan edən istənilən ukraynalı siyasətçi məhvə məhkum olacaq. Həm siyasi, həm də prinsip etibarilə onun gələcək həyatı üçün çoxlu problemlər yaradacaq”, - ekspert bildirib.
Həmçinin Seleznyov qeyd edib ki, hazırda Ukraynanın Krımı azad etmək üçün kifayət qədər qüvvə və vasitələri yoxdur:
“Güclü tərəflərimiz, imkanlarımız və perspektivlərimizi qiymətləndirərək tamamilə konstruktiv və rasional olmalıyıq. Amma söhbət Krım və Sevastopoldan rəsmən imtinadan gedirsə, düşünürəm ki, Ukraynanın hökumət rəsmiləri və ya cəmiyyətin nümayəndələrinin heç biri belə qərarlar qəbul etməyəcək”.
Onun fikrincə, yalnız bir çıxış yolu var - Ukraynanın “güclü nüvə” yarada biləcəyi tərəfdaşlar və müttəfiqlər axtarmaq:
“Avropa qitəsinin tam mərkəzində yerləşən bir növ İsrail dövləti. Çünki başqa yol yoxdur. Özünü müdafiə edə bilməyən ölkə məhvə məhkumdur”.
Xatırladaq ki, bundan əvvəl Amerika mediası Donald Trampın Ukraynaya yeddi bəndlik sülh planı təklif etdiyi barədə məlumat yaymışdı. Təklifə Krımın Rusiya ərazisi kimi tanınması da daxildir. Ukrayna Prezidenti Volodimir Zelenski bundan sonra təklifdən imtina etdiyini açıqlayıb.
