Avropa İttifaqının (Aİ) Azərbaycanla Ermənistan arasında münasibətlərin normallaşmasına dəstək səyləri davam etdirilməlidir.
“Report” xəbər verir ki, bu barədə Aİ-nin Cənubi Qafqaz və Gürcüstandakı böhran üzrə xüsusi nümayəndəsi Maqdalena Qrononun “X” sosial şəbəkəsində rəsmi səhifəsində dərc olunan məqalədə qeyd olunub.
“Yenicə Praqadakı ikigünlük intensiv görüşlər yekunlaşdı. Çexiyalı həmkarlarıma, xüsusilə də nazir Yan Lipavskiyə səmimi qəbula və Cənubi Qafqazla bağlı açıq fikir mübadiləsinə görə minnətdaram. Aİ-nin Azərbaycan və Ermənistan arasında münasibətlərin normallaşmasına dəstək vermək üçün səylərini davam etdirməsinin vacibliyini və sülh müqaviləsi üzrə danışıqların başa çatması ilə bağlı ötən həftə verilən bəyanatların əhəmiyyətini vurğuladım”, - paylaşımda deyilir.
Çexiya XİN başçısı Yan Lipavski isə “X” şəbəkəsində qeyd edib ki, Maqdalena Qrono ilə görüşdə Cənubi Qafqazdakı çağırışlar və imkanlar, Gürcüstandakı böhran, regionda sabitlik, Aİ-nin rolu və münaqişələrin sülh yolu ilə həlli imkanları müzakirə olunub.
