“Türkiyənin yerləşdiyi bölgə qlobal güc mərkəzlərindən birinə çevriləcək. Bu regionun sərhədləri Cənubi Qafqaz, Balkanlar, Mərkəzi Asiya və Yaxın Şərqi əhatə edəcək”.
AZƏRTAC xəbər verir ki, bu barədə Türkiyə Böyük Millət Məclisinin (TBMM) sədri Numan Kurtulmuş Özbəkistanda jurnalistlərlə söhbətində bildirib.
Onun sözlərinə görə, yeni dünya düzənində Türkiyə “ulduzu xüsusilə parlaq olacaq” 4-5 dövlət arasında yer alacaq.
“Əminəm ki, heç bir dövlət, bölgə və ya qitə dünya proseslərini daha təkbaşına idarə edə bilməyəcək”, - deyə TBMM spikeri qeyd edib.
Eyni zamanda, o, “daha ədalətli və səmərəli dünya münasibətləri sisteminin” formalaşmasının mümkünlüyünə əminliyini ifadə edib.
“Yeni dünya nizamının əsasında “ədalət” prinsipi olmalıdır. Tarix güclü deyil, haqlı olan dövlətlər tərəfindən yazılmalıdır. Ərazisindən və gücündən asılı olmayaraq bütün ölkələr bərabərhüquqlu olmalıdır”, - deyən N.Kurtulmuş, mövcud dünya münasibətləri sisteminin müasirliyin çağırışlarına cavab vermədiyini vurğulayıb.
