PKK/YPG terror təşkilatına bağlı SDQ-nin lideri Mazlum Abdi PKK başçısı Abdullah Öcalanın fevralın 15-də bir bəyanat verəcəyini açıqlayıb.
Teleqraf.com xəbər verir ki, bu barədə İtaliyanın “III Manifesto” qəzeti məlumat yayıb.
Məqalədə Abdinin nəşrə iki mühüm məlumat verdiyi və Öcalanın fevralın 15-də Keniyada saxlanılmasının 26-cı ildönümündə bəyanat verəcəyini təsdiqlədiyi bildirilib.
SDQ lideri bəyanatın video şəklində də ola biləcəyini iddia edib: “İnanırıq ki, bəyanatda Suriyanın şimal-şərqi ilə bağlı nəsə olacaq. Abdullah Öcalanın bu bölgə ilə çox sıx əlaqələri var. Burada hər şey bir-birinə bağlıdır”.
Abdi həmçinin Suriyanın yeni rəhbərliyi ilə dialoqun daha geniş danışıqlar prosesinin bir hissəsi olduğunu deyib.
“Hürriyət” yazır ki, DEM Partiyası mənbələrinin təşkilata yaxın mətbuat orqanlarına verdikləri məlumata görə, Öcalan fevralın 15-də PKK-ya silahı yerə qoymaq çağırışı etmək istəyir:
“Öcalanın gözlənilən açıqlamanı videoçəkiliş vasitəsilə öz səsi ilə vermək istədiyi, hətta yüksək səviyyəli bir dövlət məmuru və ya rəsmisinin iştirakı ilə bəyanatını gücləndirməyi planlaşdırdığı bəlli olub. Bununla belə, hökumət mənbələrinin videoçəkilişə müsbət yanaşmadıqları və bəyanatın yazılı şəkildə olmasına üstünlük verdikləri bildirilir”.
