Bununla Ermənistan həm başqa dövlətin ərazisinə iddialardan əl çəkir, həm də avrointeqrasiya məsələsini qanuniləşdirir
Ermənistanın Baş naziri Nikol Paşinyan Konstitusiyanın dəyişdirilməsindən danışıb. Baş nazir konkret zaman və tarix deməsə də, bu məsələnin zəruri olduğunu bildirib. Ermənistanın ədliyyə naziri Srbui Qalyan yeni Konstitusiyanın 2026-cı il parlament seçkilərinə qədər hazır ola biləcəyini deyib. Nazir yeni mətn üzərində işlərə başlanıldığının anonsunu verib. Ancaq ədliyyə nazirinin sözlərinə görə, yeni Konstitusiya ilə bağlı referendum parlament seçkilərindən sonra keçirilməlidir. Ekspertlər qeyd ediblər ki, Nikol Paşinyan Konstitusiyanı dəyişdirmək məqsədilə referendumu gecikdirməməlidir. Paşinyan nə qədər ki, müxalifətdən güclüdür, referendumu keçirib, özünün də söylədiyi kimi, Azərbaycan və Türkiyə ilə münasibətləri normallaşdırmağa çalışmalıdır.
Millət vəkili Arzu Nağıyev deyib ki, Azərbaycan və Ermənistan arasında sülh müqaviləsinin imzalanmasının ən mühüm şərtlərindən biri Ermənistan Konstitusiyasının dəyişdirilməsidir. Deputatın sözlərinə görə, zaman-zaman bu məsələ Ermənistan parlamentində, eyni zamanda müxtəlif siyasətçilər tərəfindən gündəmə gətirilib:
"Artıq Baş nazir Nikol Paşinyanın öz dilindən bu məsələ gündəmdədir. Paşinyan buna əsas kimi təkcə Rusiyadan gələn yolu deyil, ümumiyyətlə, iqtisadi proseslərin difersifikasiyanı, şaxələndirilməsini vurğulayır. Yəni baş nazir bunun birbaşa Azərbaycanın tələbi olduğunu demir. Amma məlum məsələdir ki, burada söhbət Türkiyə və Azərbaycana ərazi iddilarının aradan qaldırılmasından gedir. Əvvəllər dedilər ki, bu məsələni Konstitusiya Məhkəməsində həll edəcəklər. Daha sonra parlament səviyyəsində olacağını söylədilər. Bəzi siyasətçilər bunun referendumsuz da mümkün olduğunu iddia edirlər. Bu mənada problemlər var. Düşünürəm ki, Paşinyan sadəcə avrointeqrasiya məsələsini deyil, Azərbaycanı da mütləq şəkildə nəzərə almaqla bu addımları atmağa çalışır. Yəni həm başqa dövlətin ərazisinə iddialardan əl çəkilir, həm də avrointeqrasiya məsələsini qanuniləşdirirlər. Paşinyanın müraciəti bununla bağlıdır. Görünür, Ermənistan vətəndaşlarını da bu prosesə hazırlayırlar".
