- "Bu sözlər hazırkı hakimiyyətin ailə üzvləri, qohumları və dostları üçün də siqnaldır"
Ermənistanın Baş naziri Nikol Paşinyan parlamentdə çıxışı zamanı keçmiş hakimiyyətin nümayəndələrinin və onları dəstəkləyən oliqarxların həbs edilməli olduğunu bildirib.
Paşinyanın sözlərinə görə, bu, baş nazirin deyil, xalqın tələbidir.
“Bəli, onlar həbsdə olmalıdırlar. Dövlət xalqın iradəsini yerinə yetirməlidir və onların seçiciləri satın almaq üçün artıq pulları olmamalıdır. Bu, mənim siyasi vəzifəmdir. Bunu mən demirəm – bunu xalq deyir. Qoy kimsə bunu yerinə yetirməyə çalışmasın. Sizin mafiya dövrünüz başa çatıb. O vaxt istədiyiniz şəxsi satıb ala bilirdiniz”, -deyə Paşinyan bildirib.
Baş nazir əlavə edib ki, bu sözlər hazırkı hakimiyyətin ailə üzvləri, qohumları və dostları üçün də siqnaldır. Onun sözlərinə görə, heç kəs keçmişdə törədilmiş bu cür cinayətləri təkrarlamamalıdır.
Paşinyan bildirib ki, hakimiyyətə “sadiq korrupsionerlər” lazım deyil.
Onun sözlərinə görə, hakimiyyət dəyişikliyindən sonrakı səkkiz il ərzində məhkəmə sistemi faktiki olaraq heç kimə tabe olmayıb və bu da bəzi hakimlərə qanunsuz əldə edilmiş əmlakla bağlı işləri illərlə uzatmağa imkan verib.
Paşinyan buna keçmiş Dövlət Gəlirləri Komitəsinin rəhbəri və maliyyə naziri Qagik Xaçaturyanın işini nümunə göstərib. Onun sözlərinə görə, işə baxan hakim müxtəlif bəhanələrlə prosesi uzadıb və nəticədə özü təqaüdə çıxıb.
Baş nazir həmçinin bildirib ki, hakimiyyət dəyişikliyindən sonra keçmiş hakimiyyət rəhbərlərinə və onlara yaxın oliqarxlara törətdikləri cinayətləri etiraf etmək və əmlaklarının 25 faizini özlərində saxlamaq imkanı verilib. Lakin onun sözlərinə görə, heç kim bu imkandan istifadə etməyib.
Qeyd edək ki, avqustun 25-də Ermənistanın ikinci prezidenti Robert Koçaryanın, oğlu Levon Koçaryanın evlərində, həmçinin ailələrinə məxsus şirkətlərdə axtarışlar aparılıb. Robert Koçaryan və böyük oğlu Sedrak Koçaryan saxlanılıb.
Bu hadisələr avqustun 24-də parlamentdə Levon Koçaryanla Nikol Paşinyan arasında baş verən sözlü qarşıdurmadan sonra yaşanıb. Paşinyan Koçaryanın hakimiyyətdə olduğu 10 il ərzində necə milyonçu olmasına dair sual verib və qanunsuz əldə edilmiş əmlakın “Koçaryan və Sarkisyan klanı”ndan geri alınmalı olduğunu bildirib.
Levon Koçaryan isə Paşinyanın bu cür açıqlamalar verməyə və heç bir əsas olmadan insanı günahkar elan etməyə haqqı olmadığını deyib.
