Ermənistanın Baş naziri Nikol Paşinyan Azərbaycanı Qurban bayramı münasibətilə təbrik edib. Paşinyan bu barədə “X” hesabında paylaşım edib:
"Azərbaycan Respublikası və xalqını Qurban bayramı münasibətilə təbrik edirəm. Ölkələrimizə və xalqlarımıza sülh və firavanlıq arzu edirəm”. Qeyd edək ki, N.Paşinyan Qurban bayramı münasibəti ilə Türkiyə prezidenti R.T.Ərdoğana da zəng edərək təbriklərini çatdırıb və bir sıra başqa məsələlər də müzakirə edilib. Bəzi ekspertlər bunu Paşinyan hökumətinin çıxılmaz durumda olması, mövcud reallığı dərk etməsi kimi şərh etsələr də, baş nazirin təbrikini növbəti erməni hiyləgərliyi kimi şərh edənlər də var.
Millət vəkili Sahib Alıyev "Sherg.az"a deyib ki, Ermənistan baş nazirinin Qurban Bayramı ilə bağlı təbrikinin bir səbəbi var.
Deputatın sözlərinə görə, səbəbi budur ki, Paşinyan gələn il keçiriləcək parlament seçkisi qabağı elektorata Azərbaycanla sülhün ancaq onun zamanında mümkün olduğunu aşılamağa çalışır:
"Ermənistanda aparılan sorğular düşmənçiliyə son qoymaq niyyətindən çox uzaq olsalar da, yeni savaş başlayacağı təqdirdə onları nə gözlədiyini yaxşı bildiklərindən hayların böyük hissəsinin sülh istədiklərini göstərir.
Paşinyanın "sülh göyərçinliyi" də beynəlxaq auditoriyaya oynamaqla yanaşı, həm də bu reallıqla bağlıdır. Görün, işin harasıdır ki, hətta quzğun Köçəryan da "daha sülhpərvər Ermənistan" quracaqlarından dəm vurur. Köçəryanla hər şey aydındır. Paşinyana gəldikdə, əgər Azərbaycandan arzuladığı davranışı görmək istəyirsə, sülh tərəfdarı təəssüratı yaratmaq əvəzinə bu yöndə real addımlar atmalı, dövlətimizin irəli sürdüyü iki tələbi yerinə yetirməlidir".
