ABŞ Prezidenti Donald Trampın Rusiya lideri Vladimir Putini Ukrayna müharibəsinə görə tənqid etməsindən sonra Rusiya dövlət mediası və sosial şəbəkələrində Trampa qarşı tənqidlər artıb.
Sherg.az xəbər verir ki, "The Moscov Times" yazır ki, Trampın Putini "saçma fikirlər" səsləndirməkdə ittiham etməsindən sonra Rusiya mediası onun ağlını və siyasi etibarlığını sorğulamağa başlayıb.
Kremlə yaxın aparıcı Vladimir Solovyov Trampın “Bayden kimi davranmağa başladığını” deyib. "Rossiya 1" kanalında isə Trampın sələfi Baydenə bənzədiyi və "özünün şəxsi Əfqanıstanı"na yaxınlaşdığı bildirilib.
VKontakte sosial şəbəkəsində Trampa qarşı 2 mindən çox tənqidi şərh yazılıb. Onun “axmaq”, “boşboğaz” və “bipolyar” kimi ifadələrlə tənqid olunduğu qeyd olunur.
Tramp, 4 iyulda Putinlə telefon danışığından sonra Ukraynaya silah dəstəyinin davam edəcəyini açıqlamışdı. Lakin bəzi ABŞ mənbələri silah tədarükünün qismən dayandırıldığını təsdiqləyib.
