“Rusiya Ukrayna tərəfi ilə hərtərəfli danışıqlara hazırdır”.
AZƏRTAC xəbər verir ki, bu barədə Rusiya Prezidenti Vladimir Putin dünyanın aparıcı informasiya agentliklərinin rəhbərləri ilə görüşdə bildirib. O, Türkiyə Prezidenti Rəcəb Tayyib Ərdoğana danışıqlar üçün platforma təqdim etdiyinə və sülh təşəbbüslərinə dəstəyinə görə təşəkkürünü ifadə edib.
Putin qeyd edib ki, Rusiya və Ukrayna nümayəndə heyətləri arasında təmaslar davam edir və növbəti görüş iyunun 22-dən sonra baş tuta bilər. O, həmçinin Türkiyə tərəfinin səylərinə toxunaraq vurğulayıb ki, Prezident Ərdoğan və xarici işlər naziri Hakan Fidan nizamlanmanın əldə olunması üçün çox iş görür.
Rusiya lideri Ukrayna Prezidenti Volodimir Zelenski ilə görüşü istisna etmədiyini bildirib, lakin Kiyevdə mümkün razılaşmaları imzalamağa kimin səlahiyyətli olacağına dair şübhələrini ifadə edib. Putin, həmçinin münaqişənin humanitar aspektlərinə, o cümlədən həlak olanların cəsədlərinin qaytarılması məsələsinə toxunub. Rusiya dövlət başçısı Çin, Hindistan və digər BRICS ölkələrinin konstruktiv roluna ümid edir. Onun sözlərinə görə, bu ölkələr münaqişənin sülh yolu ilə həllində səmimi maraq göstərirlər.
“Biz də bu münaqişəni başa çatdırmaq istəyirik və mümkün qədər tez. Əlbəttə, yaxşı olardı ki, bu, sülh yolu ilə olsun”, – deyə Rusiya Prezidenti vurğulayıb.
