Milli Məclisin İnsan Hüquqları Komitəsinin sədri, deputat Zahid Oruc bu il “qızıl amnistiya” qərarının olacağı ehtimalını irəli sürüb. Millət vəkili bildirib ki, Vətən Müharibəsində qələbə milli birlik olmadan qazanıla bilməzdi.
Onun sözlərinə görə, Ali Baş Komandan İlham Əliyev bütün idarəçiliyi dövründə dövlətin humanizm siyasətini digər tədbirlərdən üstün tutub:
“Əfv Komissiyasının üzvü kimi aldığımız müraciətlərin içərisində son dövrlər məhz şəhid ailələrinə və yaralı hərbçilərimizə yaxın insanların, eləcə də arxa cəbhədə fədakarlıq göstərən insanlarımızın yaxınları ilə bağlı böyük əfv, yaxud “qızıl amnistiya” gözləntisində olanlar çoxluq təşkil edir.
Prezident İlham Əliyevin “qızıl amnistiya” qərarı ilə çıxış edəcəyi haqda informasiyaları Zəfər salnaməmizin davamı kimi görmək istəyənlər daha çoxdur. Lakin bir qədər gözləyək və sıx iş qrafiki altında, gərgin beynəlxalq və daxili gündəlik, xüsusilə Böyük Qayıdış strategiyası üzərində çalışan ölkə rəhbərinin ən mühüm dövləti işlər içərisində azadlıq arzusunda olan insanları da sevindirəcəyinə hər birimiz dərindən inanırıq. Qəbul ediləcəyi təqdirdə “qızıl amnistiya” ictimai-siyasi-hüquqi akt kimi yeni tariximizə mühüm səhifə kimi daxil olacaq”.
Prezident yanında Əfv Komissiyasının üzvü, “525-ci qəzet”in baş redaktoru Rəşad Məcid “Sherg.az”a açıqlamasında bildirib ki, son 1 ildə Əfv Komissiyası pandemiya səbəbindən toplaşmayıb:
“Adətən yanvar ayından sonra bu iclaslar başlayırdı. Obyektiv səbəbdən isə toplantılar baş tutmur. Lakin əhali, xüsusilə məhkum edilmiş şəxslərin yaxınları çox maraqlanır. Ona görə də amnistiya məsələsinin gündəmə gəlməsi məqsədəuyğun olar. Çünki amnistiya ilə bağlı sonuncu dəfə bir neçə il öncə Birinci vitse-prezident Mehriban xanım Əliyeva Parlamentdə çıxış etmişdi”.
R.Məcid qeyd edib ki, 44 günlük Vətən müharibəsini uğurla başa vumuşuq, ölkəmizdə xoş bir ovqat yaranıb:
“Əlbəttə, bu ovqat bütün ölkəyə, o cümlədən məhkumlara və onların yaxınlarına təsir göstərib. Fikrimcə, belə bir zamanda amnistiya aktı qəbul olunsa, yaxşı olar.
Zahid Orucun fikirlərini dəstəkləyirəm. İnanıram ki, “qızıl amnistiya” təşəbbüsünün olması ölkədəki milli birlik və “Dəmir yumruq” ab-havasını daha da gücləndirəcək”.
