Dünya mediasında geniş əks-səda doğuran açıqlamalara görə, ABŞ Prezidenti Donald Trampın Rusiya Prezidenti Vladimir Putini “odla oynamaqda” ittiham etməsi onun ruh halının və yanaşmasının kəskin dəyişməsini göstərir.
Sherg.az xəbər verir ki, "El Cezire" xəbər saytının məlumatına görə, Trampın bu sərt açıqlamasına Rusiyanın keçmiş dövlət başqanlarından, Təhlükəsizlik Şurasının sədr müavini Dmitri Medvedev sosial şəbəkədə sərt cavab verib. O, “Üçüncü dünya müharibəsi”nin başlanmasının ən böyük təhlükə olduğunu vurğulayıb.
Trampın Ukrayna üzrə xüsusi nümayəndəsi Kiç Kellogg isə bu mövqeyi “Üçüncü dünya müharibəsi qorxusunu artırmaq təhlükəli və məsuliyyətsizdir” — deyə tənqid edib.
“The New York Post” və “Politico” kimi ABŞ mətbuatı Trampın Putinə münasibətdə kəskin dəyişiklik etdiyini, əvvəlki yumşaq yanaşmadan sərt ritorikaya keçdiyini qeyd edirlər. Bu dəyişiklik Rusiyanın Ukraynaya qarşı ən böyük hava hücumu ilə eyni vaxtda baş verib.
Böyük Britaniyanın “The Independent” qəzeti isə Trampın Putini tənqid edən açıqlamalarının onun Ukrayna müharibəsini daha çox tənqid etməsinə görə sonrakı bəyanatlarında Putinə dəstək kimi şərh olunduğunu yazır.
Rusiyanın dövlət media orqanı RT isə Trampın açıqlamalarını satirik tərzdə tənqid edib və onun fikirlərində ardıcıllığın olmadığını vurğulayıb.
Almaniyanın “Der Spiegel” dərgisindən Roland Nelles isə “Trampın artıq bir Putin problemi var” deyərək, onun sərt ritorikasının daxili siyasətdə zəifləmək qorxusundan irəli gəldiyini vurğulayıb. O, Trampın Ukrayna məsələsində uğur əldə etməzsə, “böyük krizis meneceri” imicinə ciddi zərbə vuracağını bildirib.
Nelles əlavə edib ki, Trampın vaxtı daralır və bu məsələ ilə bağlı həm Avropa, həm də öz partiyası daxilində Senatda ciddi təzyiqlər mövcuddur.
Qeyd edək ki, Tramp Putini “odla oynayan” kimi səciyyələndirmiş və Rusiyada vəziyyətin onun prezident olmadığı halda daha pis ola biləcəyini vurğulamışdı. O, Rusiyanın Ukrayna ilə sülhə tələsməməsindən narazılıq ifadə etmişdir.
