Bu təcrübə əməkdaşımızın jurnalistika sahəsində bilik və bacarıqlarını daha da inkişaf etdirməsi üçün önəmli addım olacaq
Xəbər verdiyimiz kimi, “Azərbaycan Türk Ocağı” İctimai Birliyinin təsis etdiyi Qənirə Paşayeva adına mükafat bu il Bakı Dövlət Universiteti Jurnalistika fakültəsinin tələbəsi, "Şərq" qəzetinin əməkdaşı Banuçiçək Kalbalıyevaya təqdim olunub. Mükafatlandırma mərhum millət vəkili Qənirə Paşayevanın xatirəsinə həsr olunmuş tədbir çərçivəsində keçirilib.
Qeyd edək ki, “Azərbaycan Türk Ocağı” İctimai Birliyinin təsis etdiyi Qənirə Paşayeva adına mükafatın hər il bir nəfər gənc jurnalistə verilməsi nəzərdə tutulub. Tədbirdə Azərbaycanın tanınmış jurnalistləri və ziyalıları ilə yanaşı, mərhum millət vəkili Qənirə Paşayevanın Türkiyədə yaşayan bacısı Kəmalə Paşayeva da iştirak edib. O, çıxışı zamanı Banuçiçək Kalbalıyevaya Türkiyədə televiziya sahəsində təcrübə qazanmasına yardım edəcəyini söyləyib.
Sevindirici haldır ki, artıq Banuçiçək Kalbalıyeva dünyaca məşhur CNN Türk telekanalında təcrübə keçmək imkanı qazanıb.
Bu təcrübə əməkdaşımızın jurnalistika sahəsində bilik və bacarıqlarını daha da inkişaf etdirməsi üçün önəmli addım olacaq.
“Şərq” qəzeti olaraq biz də əməkdaşımızı təbrik edir, gələcək fəaliyyətində uğurlar arzulayırıq.
